【專訪】 陳家樂無緣與陳偉霆組Sun Boy'z:只怪以前唔知自己要乜

撰文:
最後更新日期:

陳偉霆在18歲那年,參加全球華人新秀歌唱大賽香港區選拔賽並得到了冠軍、繼而簽約英皇。由《迪士尼開心星期六》的主持到組合Sun Boy'z、再轉戰大陸做男神,如今年收1.2億登上褔布斯名人榜。

與他在同一屆比賽的,還有陳家樂,加入英皇之後,也曾被列入Sun Boy'z候選人,要是當初他不是認為自己唔唱得又唔跳得,而自我放棄、沒有拒絕聽導演的說話而搞到三年無嘢撈,他現有所擁有的會否更多?

03年參加新秀,06年正式入行,陳家樂不經不覺出道11年,但待機時間可能佔了一大半。「入行咁耐工作量唔高,無角色令人深刻,無乜人識都正常。」(黃國立攝)

陳家樂說自己唱歌難聽又怕羞,當年之所以參加新秀,全因女朋友暪住他報名,16強止步後,他不斷被介紹到各個唱片公司試音。「每次一話試音我都會甩底,直到有次英皇同事打嚟爆晒粗問我點解要甩底,話我如果唔去就要俾book studio錢。」收到合約時,陳家樂剛畢業兩年,與其做自己不喜歡的工,倒不如入行搏一個做演員的機會。「開頭打算叫我入Sun Boy'z,有去排舞,但好挫敗,結果連堂都唔上,又唔同公司講,返去打工。」又過了幾年之後,陳家樂遇上了《盛裝舞步愛作戰》,該劇為他打開了知名度,令他產生了「自己係得嘅」錯覺,同年在電影《很想和你在一起》近乎不按劇本的演出,結果換來「之後就無人再搵我拍嘢。」自信心直插谷底,終日收埋唔願見人,零工作三年之久。「當時係呃緊自己,覺得會有嘢做,實際上一年開得兩三日工,去到第四年所有積蓄都用晒,真係好窮,爸爸成日攝幾百蚊入我銀包,當時係咁過活。」
 

關智斌當年退出Boy'z後,加入了麥子豪以及陳偉霆,與張致恆另組Sun Boy'z。陳家樂曾經跟隨他們練舞,但手腳唔協調,令他十分挫敗。

正當陳家樂準備跟公司開口說要解約之際,麥曦茵執導的《DIVA華麗之後》拯救了他。「之前在不同的場合有見過麥導演,同佢傾好多自己對演戲的抱負,可能因為咁佢開《DIVA》時預咗個角色比我,心態係開心,但唔敢諗太多,當係拍告別作。」在麥曦茵的扶持下,陳家樂慢慢出了谷底,適時,公司成立了電影部,為他的事業帶來了轉機。「如果無嗰幾年的失落,唔會識珍惜,呢個錯嚟得幾及時,心態上同演技都有得著。」

去年上映的《幸運是我》,飾演腦退化的惠英紅得到了金像獎「最佳女主角」,陳家樂也得到了華語青年影像論壇的「年度新銳男演員」,對家人、對自己也算是有一點交代。「不過導演唔係第一個想搵我,所以都真係幸運是我。」拍罷《幸》之後,陳家樂又陷入了待機狀態,公司同事把他半推半賣到馬來西亞的片商。「佢哋求人試吓用我,開頭都No,但剛好《幸》預告播出,對方覺得我好像可以,於是就去了馬來西亞拍。」結果陳家樂為該電影公司一連拍了兩部鬼片,到《幸》上映時,又被參加首映的陳友看中,邀他拍攝溫拿自傳電影,一下子過得十分充實。
 

《DIVA華麗之後》差啲就係陳家樂的告別之作。(網上圖片)

同期出道的陳偉霆與關智斌,近年在大陸發展得順風順水,陳家樂可曾有一絲羨慕?「我認識的William係好值得擁有今日的成就,佢好識得諗,知道市場需要大隻型男時,已經操到好fit,真係戥佢開心。我只會怪自己以前唔知自己要咩。」陳家樂的IG followers 兩萬人不到,要是KOL倒也可以接受,但他是個出道10年的藝人,到底問題出在哪?他縮一縮膊,說訪問前才剛剛被同事「檢討」完,「有啲位我會覺得,係好嘅,自然會有人欣賞,唔需要刻意話俾人聽……」說罷連他本人也感到不好意思而笑了出聲。「我真係好老派,哈哈,今日開始我會反省。」

陳家樂至今依然係未有勇氣睇返自己在《很想和你在一起》的演技。(網上圖片)

前年與彭于晏、崔始源等人拍攝《破風》,大好機會在前,卻在開鏡時炒車導致斷鎖骨……(網上圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。