【誇世代】李佳芯兩套劇成視后大熱　年尾頒獎禮再下一城？

今年第四套台慶劇《誇世代》今晚終於跟大家見面，全劇50集，匯聚TVB一眾花旦小生（不少人客串演出），卡士陣容隨時跟台慶有得比！如此重本的劇集，在年尾的頒獎禮通常都會成為大贏家，而作為劇中的第二女主角，剛剛在「星和無綫電視大獎」勇奪視后的李佳芯（Ali），究竟能否憑此劇再在年尾奪得香港的視后呢？

今年視后暫時的人選，有同劇的田蕊妮，還有胡定欣、黃翠如、宣萱，看下去大家都勢均力敵，沒有一個特別跑出，但Ali已經在星和先拔頭籌，絕對可以說是稍微傾先，而且今年有兩套紅劇，《踩過界》和《誇世代》，比起其他女星都更有籌碼，她有信心在年尾再下一城嗎？Ali在接受《香港01》訪問時說：「其實本身都無諗過會拎到星和視后，當然亦都好開心，新加坡嘅觀眾好鍾意Never呢個角色而令到我拎到獎。我真係唔清楚香港觀眾嘅口味，唔知佢哋鍾唔鍾意呢個角色，獎項都係平常心喇，因為太多因素會影響喇，又要睇對手，又要睇公司安排，所以唔諗喇，對我嚟講拎咗星和已經係一個好大好大嘅鼓勵。（香港觀眾最鍾意你俾鷲哥鬧嗰幕喎？）竟然係鷲哥嗰幕？因為對手好囉，所以有時角色定位真係好重要，喺《巨輪II》入面我只係小角色，戲份亦都唔多，但就係因為有個好對手，同埋設計到一場好嘅戲，而令到觀眾印象好深。呢啲都係我哋演員要做嘅嘢，做好每一場戲，但個結果出到嚟係點真係估唔到，呢個就係一個好好嘅例于，我都估唔到呢一幕喺觀眾眼中係咁深刻，一定要多謝鷲哥，同埋每一個編劇。」

Ali給人的感覺是，永遠帶着一點性感，無論在《踩過界》，抑或早前的《與諜同謀》和《律政強人》都令人眼前一亮，不過她早就說過自己其實不太喜歡，奈何觀眾們受落，她說：「我希望觀眾可以見到多啲唔同嘅我，之前可能我都係比較多做小三，觀眾覺得我行出嚟就係要好sexy、好貼身。今次呢套劇（《誇世代》）又係另一個我，我覺得Paris呢個角色係一個死𡃁妹，係一個好大膽，咩都敢做而且好直接嘅人。今次都會有性感場面，因為Paris呢個人行出嚟一定要靚同浮誇，不過呢種性感同Never（《踩過界》）又唔一樣，會係比較活力青春，短裙長靴嗰種性感。」今次在《誇世代》，Ali和陳豪會飾演一對歡喜怨家，會出現又打又摸的情節，慢慢產生感情，不過中間又會出現不少的第三者，例如森美和張繼聰。

大家都知道，Ali早前才接受完子宮囊腫切除手術，好快就要出席TVB的宣傳活動，身體頂得順嗎？她說：「做完手術10日左右，其實都OK，係個人會比較容易累，但係一般簡單宣傳工作都做到，但都盡量避免去著高踭鞋。之後定期都要覆診，早幾日我去咗洗傷口，之後都要返去睇個情況。其實發生呢件事都好，提醒我女性真係要做好身體檢查，定期去做婦科檢查，因為我有咗呢個瘤之後，發現係好普遍嘅女性病，身邊都唔少女性朋友試過。我都算係好突發，發現嗰陣已經有10 cm大，到真係做手術都已經超過10 cm，佢變大嘅速度好快，加上我好痛，所以要即時做呢個手術。多啲留意自己囉，愛錫自己，我都覺得好好彩，今次係良性嘅瘤，入面好多都係水，唔影響我生育嗰啲。做完呢個手術我好感恩，可能我平時比較自閉，無乜主動搵人，但原來身邊都好多人錫我、關心我，仲主動煲湯俾我，多謝大家。」雖然工作誠意十足，但真是要多點休息，不過年尾又要爭視后，的確要谷一谷人氣，希望Ali的辛苦會有回報喇！