【誇世代】同歐陽震華互換身體惹罷睇？　吳業坤：習以為常喇

50集長劇《誇世代》終於出街，難得有長篇劇出街，都引起網民熱烈討論。而且，根據討論區定律，「逢紅必反」是少不免的，今次被「反」的對象，就是人稱「偽毒」的坤哥吳業坤。第一集尾段的劇情，坤哥就以與歐陽震華「靈魂互換」的方式出場，有網民就擔心，同得歐陽Bobby互換，實會有好多戲份，就開始想罷睇。至於坤哥得知這個消息之後，他都無奈地說道：「我都習以為常㗎喇。」不過他相信他的出現不會就此影響收視：「唔會因為我而搞到收視低，再者我對呢套劇好有信心囉！又咁多勁人又搞笑。」

講起靈魂互換，類似的劇情亦屢見不鮮，最深入民心就是《無頭東宮》，雖則是換臉，但與靈魂交換相差無幾。而坤哥講到今次與歐陽Bobby互換，其實是另有內情，將會在今晚揭盅，所以無可奉告。不過坤哥對今次造型下過不少苦功，就是all back頭，再配以一副白框眼鏡。白色眼鏡幾乎是上個世紀的產物，也是每個MK仔必備的潮物，為何坤哥會以此作為造型，唔通復古當時興？坤哥話：「我嘅角色係一個毒男，仲要係一個以為自己好靚仔嘅毒男。」坤哥就根據這個人物，研究這類人有甚麼特徵，於是就設計出一身「自信毒Look」，唔知大家又覺得似唔似？不過坤哥扮毒，點都畀人話係「偽毒」㗎喇！