【降魔的】黃子恆等17年終於有得做男主角:其實唔會太遲

撰文:
最後更新日期:

《降魔的》除了馬國明精湛的演出令其叫好叫座之外,劇中飾演被惡魔附身郭展明的黃子恆(Hugo)亦奸得十分出位,得到不少觀眾大讚其演技,甚至因為他還未上位而感到不忿,要為他抱不平。其實Hugo不經不覺入行已經17年,到今年憑《味想天開》先一嘗第二男主角的滋味,今年可謂他的上位年,但原來即使有多年來的付出,Hugo也曾經想過放棄。

成個奸樣出咗嚟。(電視畫面)

2000年,17歲的他,抱着一顆演藝的心,踏入無綫電視藝員訓練班,1年後正式出道在《妙手仁心II》裏面跑龍套,一跑就跑了12年。直到2013年才有第一個男配角的機會,《衝上雲霄II》開始令人記住他的臉孔,2017年年頭,《味想天開》的蓋兆天令他一嘗第二男主角的滋味。17年了,這個男主角實在來得不易,連出名遲上岸的黎耀祥也只是等了15年,是一個煎熬嗎?在接受《香港01》訪問時,Hugo說:「17年先做主角其實唔會太遲,我覺得行呢條路做主角唔係必然嘅事,亦都唔係一個指標去衡量一個演員成唔成功,所以我無諗過時間長短會係一個問題,最緊要喺個過程入面,每一年都進步緊,吸收新嘅嘢,再放到落個演出度,呢樣嘢係好緊要。至於等待嘅過程有無諗過放棄,其實係無,我唔覺得係一個等待,因為主角唔係一個指標嘛。但如果你話有無諗過放棄呢行,其實呢十幾年都無諗過,因為有好多唔同嘅嘢俾我去學,我由最低開始做起,由行行企企,到可以講嘢,對白愈來愈多,甚至可以參與電影,呢段時間好多嘢去玩緊,我好enjoy。」

在《衝上雲霄II》,他飾演胡定欣的男朋友。(電視畫面)

每一個演員都在等機會,也就是等時間過,好運的話上岸可以好快,近來都不少人一入TVB就極速上位,對於Hugo來說並不眼紅,他還會替每個同事高興:「可能人哋會話有其他同事條路行得比較順暢,我覺得尤其近呢幾年,有啲比較新嘅演員可能得到好多機會,我哋作為做咗咁多年會點睇佢哋,其實係絕對值得高興。係人都知做呢行機會係好緊要,佢哋表現好其實係有人睇到,機會嚟到佢哋把握得好好,同埋無論呢行定呢間公司,見人發展得好緊係好,唔通想人無運行咩,見到人哋角色好突出都會戥佢開心,可能我個人諗嘢比較正面。」

專注自己工作,機會是留給有準備的人。(Instagram圖片)

在《降魔的》裏面,Hugo飾演一個十分固執的警察,更被惡魔附身,成為劇中的奸角。不少觀眾在昨日見識到他邪惡的一面,紛紛表示奸得很入肉,原來Hugo為這套戲都花了好多心思,他說:「我好多謝觀眾欣賞我,你知無論好人定奸角都要令人有深刻印象先算成功。拍嗰陣我睇咗好多比較黑暗或者奸嘅角色去揣摩,我做功課嗰陣覺得郭展明呢個人係好直接,佢唔鍾意啲乜都會擺上面,佢會好快將自己嘅不滿話俾人知,覺得你錯。呢樣嘢其實喺現實生活係好難做到,你唔會因為唔鍾意一樣嘢就突然黑面架嘛,但呢個角色可以,所以拍嗰陣我都驚啲人覺得點解我會成日黑面又唔講嘢,呢個都係我投入角色嘅方法,希望身邊嘅人唔會覺得我乞人憎。無辦法架,郭展明呢個角色本身就係一個好乞人憎嘅人,由細到大都無朋友,只有莊芷若(黃智雯飾)由細細個開始一齊長大嘅唯一一個朋友,佢嘅人生就係咁黑暗。」其實做一個奸角真的很為難,做得夠奸,又會因為其角色被觀眾討厭,做得不夠奸,又會被批評演技不好。

郭展明唯一嘅朋友就係莊芷若。(電視畫面)

或者有些觀眾之前未聽過黃子恆這個名字,但在上年,他和裕美的感情緋聞立即令他聲名狼藉,每個人的矛頭都指向着他。「其實呢件事,呢單新聞,好老實,之前咁多年上唔上位無令我諗過放唔放棄,反而呢件事之後嗰段時間就真係有諗過,好無奈,好多嘢都做唔到。因為一路以來建立嘅嘢,原來會一下子就無晒,人哋心目中嘅感覺,監製佢哋嘅信任,會因為呢一樣嘢,嗰一下我感覺到當全世界都唔信你,其實講咩都無用。每個人都會有唔同嘅諗法,好難去改變佢哋點諗,無論我做咩都俾人先入為主,人哋都係信自己諗果一面。我覺得係對工作有影響嘅,喺我人生,嗰段時間就好似郭展明最黑暗嘅時間,無人幫到我,所以諗過去做其他嘢,如果呢行真係咁唔好彩做唔到落去,都有其他嘢可以做,同阿哥搞咗個品牌。」好在,上天不會辜負努力的人,時間令事件掉淡,公司繼續信任他,觀眾們開始重新留意他的演技,塞翁失馬,焉知非福。

繼續努力,一定會得到人重視。(Instagram圖片)

「但係當時間慢慢過去,都成年幾前,會有更加多嘅體會,就係做得呢行真係無辦法,食得鹹魚抵得渴,除咗享受人哋個讚賞,亦都要接受批評,就算唔接受都唔好太介懷,因為無可能滿足晒所有人。無論生活上、工作上都一樣,你要明白每個人都有思想,都有發言權,我控制唔到咁多嘢。其實每一件事都會有得着,壞事都唔一定只有壞影響,呢件事我學會睇開啲,繼續做自己,享受工作,其他人唔理得咁多架喇,只要你覺得自己啱,就唔好俾人影響。」有時人云亦云最恐怖,當面對着千夫所指,所承受的壓力真的難以是常人能夠猜想,Hugo成功捱過低潮,未來的路可能就是康莊大道。

+6
+5
+4


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。