【轉行仲好搵】林芊妤瑜伽照顯功架:私人教班$2000一個鐘

撰文:
最後更新日期:

尚記得2009年底,衛蘭推出嘅唱片《Wish》,裏面有咩歌大家未必講得出,不過封面嗰一張高難度瑜伽動作圖,就絕對係印象深刻:雙脚向後拗再屈番落膊頭,雙手捉住雙腳,簡直係違反人體工學。衛蘭呢張當然係後製整出嚟,但原來真係可以做得到,Coffee林芊妤最近上載一張九成似嘅瑜伽相,佢接受香港01訪問時話:「唔係專登向衛蘭致敬,不過併埋睇又真係幾似喎哈哈哈。」

林芊妤指呢一個瑜伽動作,除咗柔軟度仲好考平衡力。(林芊妤Facebook)

Coffee上載一張瑜伽動作照,相中佢以頸作支撐點,雙腳向後反,腳板底貼住頭頂……呢個瑜伽動作除咗要柔軟度十足都需要一定技巧,Coffee喺12年考到國際瑜伽導師認可資格,教授瑜伽近6年時間,對佢嚟講當然係易如反掌啦,佢接受香港01訪問時就分享做呢個Pose嘅重點:「呢個動作話難唔難話易唔易,首先要Back Bending足夠,除咗柔軟度原來仲好考平衡力,因為當隻腳放上去時,好容易會左右移動。」

問到係咪想向衛蘭致敬,Coffee就哈哈大笑話:「其實無諗過係向衛蘭致敬,純粹係影宣傳相諗一個瑜伽動作,不過見到網民拼埋兩張相,睇落又真係幾似,哈哈哈。」

大家就算無買過衛蘭隻碟,都一定記得呢張唱片封面照。(網上圖片)

而家Coffee幾乎全職教瑜伽,網上亦有大量瑜伽高難度動作示範,無論點屈點拗都得。(林芊妤Facebook)

呢張相其實係Coffee為瑜伽班招生影嘅宣傳照,上載唔到10分鐘已經名額爆滿,睇嚟市場需求好大噃,「而家教堂都真係好密,之前自己只教私人班,同埋拍片上自己嘅YouTube頻道。開咗個人頻道之後多咗女仔話想跟我上堂,不過私人班又唔係好負擔到,所以而家抽少少時間開班教學,教佢地一啲瑜伽正確知識,希望佢地學完喺屋企都可以做到練習。」

Coffee不時受邀到大型活動教授瑜伽,之前就到一個10k慈善跑終點教選手做瑜伽舒展筋骨。(林芊妤Facebook)

市面上瑜伽堂嘅學費,小班教學由$100一堂起跳,私人教學約$500起,想跟Coffee上堂又要幾錢學費呢?「私人就$2000一個鐘,Group Class就 $500一位,暫時都係開過兩三班。」以Coffee密密麻麻嘅時間表嚟睇,收入咪好可觀?「都OK啦,自己都想繼續喺幕前工作,只係而家會揀囉,唔會咩都接,因為始終時間每日得24小時,都希望揀啲有意義嘅嘢,遇到適合工作先接。」

+19
+18
+17


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。