【功守道】馬雲電影一日點擊破億 打低李連杰甄子丹變宇宙最好抽

撰文:洪曉璇
出版:更新:

到底有咩劇本可以打動李連杰、洪金寶、甄子丹、吳京等華人最著名嘅頂級動作巨星,參演同一套戲仲要齊齊坐歪做配角?電影《功守道》就做得到,因為老闆兼主角,叫做馬雲(你懂的)。之前喺精華片段中已經見到佢大戰各大武打巨星遊刃有餘,近23分鐘嘅正片11月12號晚凌晨網上有得睇,至今短短1日半點擊率已經突破1.1億,睇嚟大家真係好有興趣,馬雲嘅商業頭腦勁定武功造詣醒。吳京接受訪問時仲爆料,話李連杰講明「只許他(馬雲)打你,不許你打他」。

以咁多位巨星身價嚟睇,1日半時間有1.1億點擊率,實屬正常。(網上截圖)

短短23分鐘嘅《功守道》雙11於內地6個城市嘅影院上映,12號凌晨網上免費有得睇。之前預告片中見到馬雲輕鬆打低各路英雄,完整版中睇得更仔細,馬雲飛身踩牆捉住吊燈,飛踢相撲選手,一氣呵成非常流利,而且仲會大曬金句:「武功再高,也怕菜刀。」不過講完就唔係拎菜刀,而係拎起腳邊木棒同吳京對打,除咗押韻,其實唔知講嚟為咗乜,高人做事確係高深。中間加插一堆美女,見到馬雲大叫「好帥呀」「男神呀」,唔通馬雲大師係想話俾大家知,「你的樣子如何,你的日子未必如何?」

男神嘅定義,有時的確好廣泛……(影片截圖)
對住宇宙最強,馬雲毫不怯場,打得非常流暢。(《功守道》影片截圖)

一眾巨星都話為咗推廣太極,傳揚中國文化武學出一分力,唔介意喺戲中放低英雄形象,之前預告片中留下伏線,無講對戰甄子丹同李連杰係誰勝誰負,完整版中當然有交代啦,結果係 --- 打和,Super!甄子丹話自己打交只出三腳,出完就game over無分輸贏;對住李連杰都係一樣,對打幾吓又分開耍太極,再對望就完咗啦。就連出場時間都差唔多,馬雲同甄子丹李連杰各對打2分半鐘,計得好準呀吓。

真係好耐無睇過李連杰演出,可惜只係打咗短短2分半鐘。(影片截圖)

吳京明明喺《戰狼2》可以遇神殺神,點知對住馬雲就分半鐘已經被KO,英雄形象蕩然無存。吳京接受訪問時爆料話,拍攝《戰狼2》時收到李連杰電話,為咗維護世界和平,呀唔係,係推廣中華武術,吳京將原訂嘅手術推遲。平時拍戲對打要收力:「但馬師傅他不收勁,我說你真不留手呀,那我也不留手。」點知喺旁邊嘅李連杰就開聲:「不行!只許他(馬雲)打你,不許你打他,他待會兒要見總統,你把他打暈了誰去見呀。」就算馬雲唔使見總統,如果你係吳京,又敢唔敢真係打低馬雲呀……

唔可以打老闆,情況就同只許州官放火差不多……(影片截圖)
+5