【雜警奇兵】黃心穎拎皮鞭拍SM戲：要我主動騎喺上面尷尬啲
話晒放喺11月播出，放喺周日晚每星期連播兩集嘅《雜警奇兵》，計落其實都算係台慶劇，因為天時地利人和各種原因，一直較少人談論，不過其實識笑都真係好好笑，C君演技令大家刮目相看之餘，唔好睇黃心穎貴為BB級靚女，原來都係搞笑之人，喺最新一集同郭子豪上演SM戲，又手銬又皮鞭，睇到網友嘩嘩聲，心穎接受香港01訪問時就話：「其實佢地已經cut咗好多，可能覺得唔係好出得街。」
新一集《雜警奇兵》劇情講到黃心穎同郭子豪，放蛇到賓館扮顧客，想捉到馬蹄露扮演嘅非法勞工，咁同SM戲到底有咩關係呢？原來係郭子豪一到賓館拎銀包出嚟時唔小心跌咗手銬落地，心穎將錯就錯扮係想玩SM嘅情侶，眼罩皮鞭手銬樣樣有齊，網友對心穎忽然豪放都嚇一大跳，仲話估唔到佢會不顧形象演得咁放。心穎接受香港01訪問時就話：「佢地指嘅豪放係咩先，我個人不嬲大癲大肺好玩得架哈哈。」
「其實佢地cut咗好多，可能覺得唔係好出得街……拍嘅時候真係有啲啲尷尬，衫就唔係好性感，背心同牛仔褲，不過因為我要做主導嗰個，要騎喺郭子豪身上，拍到中段已經好熟悉個角色，其實佢都係傻嘅，拍攝過程都舒服同輕鬆嘅。」問到導演喺現場有無教應該點演，心穎就爆料話：「導演好似仲尷尬過我，係咁問咁做得唔得，咁大聲呀唔好啦，反而係佢可能怕出唔到街，我就話拍幾個version後期再揀，最後揀咗呢個比較適合兒童收看嘅版本。」到底剪咗D咩唔出得街咁嚴重？好想睇喎……
其實心穎一向俾大家甜美、乖乖女感覺，最近《森美旅行團》播出後大受歡迎，觀眾先發現唔使演戲真正嘅心穎，原來都係傻傻地，甚至比出名大癲大肺嘅麥美恩有過之而無不及，心穎就話：「拍旅遊節目太拘謹唔好睇架，當然要做番自己啦，食嘢食得樣衰啲使咩咁有儀態啫，同埋唔使講咁多食後感嘅，好食嘅睇個樣已經會知，唔使話出口俾大家知好好食好好玩。」真心share大家係感受到嘅，心穎都話非常surprise，呢個節目迴響可以話係入行以嚟最大：「《學是學非》都大但呢個短暫，而即刻好有反應，好多前輩同事，或者喺街有人行埋嚟同我講有睇覺得好好睇，突然覺得好似做咗個節目幫到人，俾到好嘅地方好嘅資訊，好有意義。」