【寶貝的新朋友】謝賢提孫仔眼濕濕：我已經好久沒見他們了
撰文：洪曉璇
出版：更新：
家有一老如有一寶，可惜有時候因為種種原因，勞碌一生後，晚年想同家人聚天倫都唔係一件容易嘅事。四哥謝賢平時出席活動依舊瀟灑，不過最近佢參加內地綜藝真人騷《寶貝的新朋友》，大家先驚覺四哥今年其實已經81歲，睇住節目中佢自己食嘢，真係有點心酸。最新一集中提起兩個孫仔時，四哥更落寞地話：「我已經好久沒有見到孫子了。」
謝賢於節目中同小朋友相處融洽，強忍腰痛彎身完成任務。(影片截圖)
新一集節目中，幾位爺爺同小朋友要落田以及捉泥鰍，以完成任務。四哥可能彎腰工作太長時間，意外觸及舊患，要瞓喺床上休息。李銳同小朋友到房間探望時，四哥話以前撞過車，整親條腰同膝蓋，不時都會隱隱作痛。雖然有舊患，但拍攝時四哥都非常落力，同小朋友一齊完成任務。
原來早年謝賢曾經撞車，令腰部及膝蓋都留有舊患。(影片截圖)
到節目尾聲時，幾位爺爺邊食邊傾，講起同仔女孫仔嘅溫馨時光，四哥整個人變得黯然，當李銳問到四哥有咩分享時，佢就話：「我？我已經好久沒有見到孫子了，現在去看孫子，就是坐在這裏看他，他們從來不會跟我玩，因為我就兩個月可以見一次。」謝霆鋒同張栢芝離婚後，兩個小朋友都係跟住媽媽生活，眨下眼Lucas和Quintus已經分別10歲及7歲，睇栢芝網上不時分享母子合照，關係非常融洽，不過同比較少機會見面嘅爺爺，小朋友就真係可能唔會太熱情親近。
提起Lucas和Quintus同自己唔太親近，謝賢都講到有點傷感。(影片截圖)
聽到孫仔同其他老人家玩得咁開心，四哥呢個落寞表情，真係令人心酸。(影片截圖)
諷刺嘅係，四哥身邊嘅張雙利呢個時候開口話：「我跟你說呀，今年我跟你兩個孫子都玩了，跟我玩得很好，正巧在一個戲上（與栢芝飾演父女），他們真的特優秀，那兩個孩子特別懂事……」可以睇到四哥流露出羨慕嘅眼神，諗到親生孫仔同其他老人家可以玩得咁開心，見到自己嘅時候就寧願兩兄弟自己玩，四哥只能酸溜溜講一句：「那你有福氣啦。」然後別過頭索鼻，網友睇完不禁話感到心酸。
+10
Lucas同Quintus跟住媽媽生活，同張栢芝比較親近亦屬正常。(張栢芝Facebook)