無綫出守則禁女藝人賣性感 高海寧:我覺得係好事

撰文:張嘉敏
出版:更新:
鄺潔楹喺《三日兩夜》有好多性感鏡頭。

女藝人出席活動時衣着打扮性感,除了靚之外,當然是為了增加自己的曝光率、見報率同收視率啦,愈多人留意自己就愈有人氣,咁自然都會愈多工作啦。性感仿佛已成為女藝人搶鏡必用的招數,尤其是出席盛大隆重的場合,真係幾乎個個女藝人都會性感上陣。觀乎一眾無綫女藝人,每逢於台慶或甚麼頒獎禮上紛紛有咁少布着咁少布就知,靠性感成為焦點呢招真係萬試萬靈。不過就有消息指無綫已正式下旨禁止女藝人性感。

TVB唔想女藝人咁性感?咁咪無得再睇到陳偉琪扮wonder woman囉?

據悉負責無綫藝員管理及發展的助理總經理樂易玲,昨晚就向全公司的藝人發出了一個工作指引,內容主要強調公司不鼓勵拍劇或綜藝節目時,有太過誇張女性身材或者賣弄性感的鏡頭。公司更已制定製作團隊及創作團隊守則讓大家跟從。而日後女藝員如果需着上三點式泳衣拍攝,例如進行水上運動、浸溫泉等鏡頭,會在適當時候安排穿上T-shirt。公司亦不會讓女藝人單獨出埠公幹,需有其他女藝人,或女性導演、女PA同行,又或藝員部的女同事跟場。公司同時也不鼓勵劇集內容涉及強姦或床上情慾戲等情節,如劇情需要則只會用「意會形式」去表達和交代。

高海寧以後喺節目度唔使再咁性感喇。

這個全新發出的工作指引偏向針對劇集和綜藝節目製作,但就未有提及要禁止女藝人在活動上打扮性感,而男藝人似乎亦不在指引所講之列,該指引只Focus在女藝人身上。香港01記者就有關消息電話訪問了屬TVB性感女神之一的高海寧,高Ling直認確有其事:「係呀,係呀,我都收到呢個Whatsapp呀,我諗公司唔係禁女藝人性感,而係喺劇集嘅拍攝或者綜藝節目嘅拍攝嘅時候呢,就唔再需要我哋着得性感喇。即係可能有啲鏡頭需要我哋着泳衣嘅,就可以着T-Shirt喺出面咁樣。我覺得係好事嚟㗎,我收到之後好開心呀,覺得可以被公司保護囉。」不過以後少了這些養眼鏡頭,觀眾可能就會好傷心了。

高ling話覺得受到公司保護所以好開心。

而在《誇世代》中色誘陳豪,身材超噴血的陳偉琪對於樂小姐所發出的工作指引就表示:「我覺得公司咁做係為咗令女藝人得到更多保障,不過過往節目同劇集入面,鏡頭前性感打扮都係因應角色同劇情需要,而且電視同電影唔同,尺度好有限。我自己同唔同嘅監製合作,佢哋都好好,溝通清楚個角色設定,同埋性感都算係有限度。我成日都講我做演員都係盡好本份,做好角色要求,其他啲嘢都無諗喇。我唔驚會少咗曝光率!我希望鍾意我嘅觀眾都係留意我啲戲,睇到我演戲嘅進步同付出,同埋我嘅性格。」另外於《三日兩夜》有浸溫泉鏡頭的鄺潔楹就謂:「其實我上次浸溫泉都有啲鏡頭係包毛巾,都無特別賣弄性感嘅,如果到時拍攝時有咩需要,例如加毛巾個啲,佢哋都會配合嘅。」

陳偉琪話電視上嘅性感其實有限唔會太大尺度。
鄺潔楹話拍攝時有咩需要,例如要毛巾都可以有嘅。

以下是該工作指引的部分內容:

致各藝員同事

1. 公司已制定製作團隊及創作團隊守則,藝員同事不論拍攝戲劇或非戲劇,公司都不鼓勵有太過誇張女性身材及賣弄性感的鏡頭。

2. 公司也不鼓勵製作鏡頭拍攝時太過誇張女性身材及賣弄性感,故日後女藝員如需穿著三點式泳衣拍攝例如水上運動、浸溫泉等的鏡頭,會在適當時候安排穿上T-shirt。

3. 公司不鼓勵戲劇製作涉及強姦或床上情慾戲等情節,如有劇情需要,只會用「意會形式」表達交代。

4. 所有要使用女藝員離港拍攝非戲劇製作,除非於海外拍攝期間有多於一位女藝員,又或有女性的導演或PA同行,否則藝員部都需要安排一位女同事同行跟場。

5. 藝員是公司最重要和寶貴的資產,公司非常重視藝員在工作上的感受,因此,藝員在工作上遭遇到任何不公平、不被尊重及不愉快經歷等時,公司歡迎藝員同事直接書寫投訴致公司內部審查組,公司主席會親自審閱和處理,並將投訴人的資料完全保密。

樂易玲

助理總經理 (藝員管理及發展)

 

 

大家遲啲可能只可以喺ig睇到呢啲畫面喇。
+23
你可能感興趣