【早霸王】瞞女友玩交友APP被飛 森美提女性:係要日日check電話

撰文:
最後更新日期:

每逢到星期五就到森美、小儀喺《早霸王》嘅「你知道唔知道有人掛住你!」環節,幫大家解決愛情疑難,最出名嘅就梗係「阿希的故事」啦,但真係鍋鍋新鮮鍋鍋甘,今日又有個迷途小羔羊叫「阿年」嘅男仔想搵森美小儀幫幫手,到底係發生咩事呢?

大家最記得應該係「阿希的故事」。(網上圖片)

事主阿年一開口就認衰仔,話自己做錯事想森美幫手叫女朋友原諒佢之後再復合,佢話同女朋友已經分咗成兩三個禮拜,仲好慘咁講:「其實呢兩個禮拜佢初時唔理我,我突然之間覺得唔可以咁,我去接佢收工,我感覺到佢態度軟化好多,我哋亦多咗對話。」森美見佢態度咁真誠,就問阿年今次到底衰咩搞到女友要嗌分手,點知阿年支吾以對,講極都唔肯講個真正原因出嚟,森美同小儀都頂唔順話佢喺度嘥大家時間。

最尾終於被森美擢到佢,原來阿年係因為瞞住女友用交友APP識朋友,佢解釋自己係因為貪玩同嗰排壓力大要去渲洩,小儀聽到都忍唔住話佢:「你係渲洩喎,應該要搵其他服務,咁唔係交友喎!」同為男人嘅森美就一下揭穿阿年:「交咩友啊!有女朋友仲用交友APP識朋友,肯定係識女仔啦!」阿年繼續狡辯:「咁我用交友APP唔係想同人地發展感情,係其他嘢。」森美就首先利申自己冇玩過交友APP,「我哋藝人唔方便玩呢啲,但有好多人攞我個樣扮我,你知唔知點解,因為我又唔紅,但又相貌端好!」

大家好鍾意打上早霸王搵森美解決愛情疑難。(視覺中國)

+3
+2

森美形容玩交友APP就係做「唔想落酒吧,但又想好似落酒吧咁」。(視覺中國)

其實男仔玩得交友APP都知道佢係「醉翁之意不在酒」,而森美就形容做「唔想落酒吧,但又想好似落酒吧咁」,大家明啦!阿年舉手投降終於肯同大家坦白,今次原來唔係佢第一次玩交友APP識女仔,阿年說:「之前就原諒過我一次,但就冇捉得咁正,之前係齋傾偈,今次嘅對話都Flirt Flirt哋,只可以話自己未夠成熟,未長大。」Flirt Flirt哋?好難捉摸喎,森美咬住唔放追問阿年到底係去到咩程度,阿年又再次支吾以對:「有啲相啊咁樣囉,18禁嗰啲囉,大家都有囉。」嘩,咁你同當年小豬網絡玩裸聊有咩分別!森美直訴:「你問我,我覺得冇得返轉頭,我以前講過嘅,女人呢,可以容忍男人同個女仔發生關係,只要你唔愛佢就得架喇;男人就相反,你可以愛第二個男人但唔可以同佢發生關係。」

森美最後好奇問阿年:「我想問你係咪用真樣架?」阿年話係,但就仲未見過對方個樣,到底點解呢,連18禁嘅相都見過,仲未約出嚟見面?原來係因為未見到佢之前已經被女朋友識破,阿年無奈咁話:「佢自己睇我電話嘅。」森美喺呢個時候就教精廣大女士們:「成日聽人講你做咩睇我電話?其實唔睇電話點Check到你班友仔,唔好話啲女人睇電話,依家係必定要睇電話,我話嘅,仲要日日都要Check住!你個答法好簡單得架喇,話我冇諗過睇架,咁啱咋,各位女人記住啊!」最後森美都有幫到阿年打畀佢女友,可惜女友就話復合要考慮一下,森美作為男人就表示:「我體諒你,但我唔可以原諒你!」

最近成日打開電視就見到森美個樣!(網上圖片)

+5
+4
+3


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。