【TVB台慶50周年】蔡思貝拜神素顏樣見真章　零化妝成全場最靚

無綫今晚將會舉行《萬千星輝賀台慶》賀50歲生日，今日中午當然要來個拜神儀式祈求一切順利，最好收視報捷添啦。咁重要的拜神儀式即使未算係全台總動員出席，但都有大部分的藝人出席到，包括有蔡思貝、馮盈盈、陳凱琳、黃心穎、洪永城以及蕭正楠等。拜神儀式於下午一時許進行，唔算好早，不過有不少藝人個樣都好似剛剛瞓醒咁。女藝人亦都無咩特別打扮到好靚，多數都是薄施脂粉，又或是戴副太陽眼鏡就算。而在一眾花旦中，蔡思貝就最勇敢，竟然素顏上陣！

素顏就最見真章喇，蔡思貝今次夠膽素顏示人，唔單止無嚇親人，反而仲突顯了她好pure好true的一面，皮膚又好，直情覺得她是全場最靚的一位添呀！再加上她的貼身黑色連身迷你裙，盡騷她的S形線條美，再露少少長腿，索呀，紮馬尾戴眼鏡仲加添幾分親切感兼萌萌的，完全是好Girlfriendable呀！

電話訪問了思貝點解咁勇敢素顏，仲要有咁多花旦姐仔小花同場，唔驚給比下去咩？思貝表示：「其實我都係諗住誠心希望今晚大家good show，50周年大騷順順利利，無諗突唔突出，好好地綵排完先化妝整頭。」不過她就無咩獨門護膚心得：「都係好基本嗰啲，飲水做運動食得健康啲，落妝落得乾淨啲。」基本功做得好真係好緊要㗎。同場的麥美恩其實也是素顏現身，可是她的臉就有些油光。男藝人就全部都素顏，當中袁偉豪依然咁靚仔，但最估唔到羅樂林都keep得好好。