【TVB台慶50周年】農夫最好笑 陸永扮DO姐：好鬼低級㗎你幾隻嘢
撰文：洪曉璇
出版：更新：
19號晚嘅《萬千星輝賀台慶》，兩小時節目賣大堆頭，曬冷式表演已經司空見慣，50位男藝人及50位女藝人唱歌跳舞，明顯見到無一秒整齊兼咪咀，都唔知笑好定戥佢地攰好。演趣劇雖然都係舊瓶新酒，不過又居然成功搶FOCUS，唔係講馬國明被逼向BOB獻出男男初吻，而係出鏡一分幾鐘嘅陸永同C君，佢地扮演鄭裕玲以及曾志偉，一出場已經令人忍俊不禁，拍案叫絕。
「好鬼低級架你幾隻嘢﹗」陸永呢句對白真係扮得好似鄭裕玲呀﹗(影片截圖)
陸永著上白色套裝裙，廋削身型加上曲髮，儼如鄭裕玲於《男親女愛》中嘅造型，佢地一行出嚟就話要應徵做司儀，不過陸永似乎好唔耐煩係咁話：「快啲啦好眼瞓呀﹗」坐喺場邊嘅正牌鄭裕玲俾佢地激到扎扎跳，陸永再以「你咁多部機我望邊一邊呀？」「好鬼低級架你幾隻嘢﹗」舉手投足加上咀臉，真係比DO DO姐更似，DID DID 姐仲唔係你﹗
一高一矮一肥一廋，加上學足小動作同口頭蟬，陸永同C君成功獲網友推舉為全晚最好笑。(陳順禎攝)
陸永C君近年多次與鄭裕玲合作。(資料圖片)
不過都不及只得一句台詞嘅C君，戴住啡色帽著灰色馬甲，加上高度都同曾志偉個月餅廣告一模一樣，C君仲以米奇老鼠聲線講一句：「打和﹗」，真係好想跟住講句SUPER﹗咁大膽連獎門人都敢玩，企喺旁邊嘅本尊當然動手打佢啦，不過觀眾就睇得相當過癮啦。近年陸永C君多次同鄭裕玲合作，DO DO嘅口頭蟬以及小動作，佢地又點會唔知呀。養兵千日用在一朝，學埋學埋襯呢分幾鐘表演，成功FIGHT低台慶夜其他表演，成為網友至愛。
一句打和引埋本尊曾志偉行出嚟，農夫今次真係好出彩。(陳順禎攝)
+7