【後生仔傾吓偈】麥明詩經常被網絡欺凌 吳業坤經常躺着也中槍

撰文:
最後更新日期:

今集講網絡欺凌。

現今網絡世界資訊發達,人人都上網的年齡層已經超逾了3歲至80這個range了,而隨住網絡世界的發展,亦形成了網絡欺凌的現象,近年更加是愈來愈嚴重。昨晚播出的一集《後生仔傾吓偈》就講網絡欺凌,仲請來了經常在網上受到言論攻擊中傷的吳業坤 (坤哥),與同樣不時會於網上備受批評的主持人麥明詩 (Louisa) 一齊分享了感受。而最令兩人覺得無辜的就是會無啦啦「躺着也中槍」地遭受到評擊。

坤哥同Louisa不時「躺着也中槍」。

坤哥就講了一個好搞笑的親身經歷做例子說:「咪有個內地節目叫《中國有嘻哈》嘅,咁就有啲網民留言話唔可以評批啲Hip Hop Man,其中有個留言就話『咁咪即係叫吳業坤去評價張學友?』,關我咩事呀?嗰個留言仲要有成千幾個like喎,太過份喇。」在旁的Louisa即表示她亦有看到這個留言,而另一主持陸浩明則笑指其實這個比諭講得幾好,好清準,大家都拍手和議,連坤哥自己都忍唔住笑,之後又嘆了一口氣。坤哥都有回應該個留言,也相當抵死:「嗰排我啱啱出咗新歌,咪post咗首歌條連結上去。」趁機宣傳新歌,坤哥果然識玩呀。

坤哥無啦啦被網民指話無資格評價歌神張學友。

至於Louisa就話她曾被某報章把麥紫莉的照片caption寫成麥明詩,變成了麥明詩着cosplay去日本拍AV:「之後估唔到有人留言話『麥明詩同嗰個麥紫莉,一個天一個地呀!』於是我即刻諗,咁邊個天邊個地先?我最驚係佢話我拍佢都唔想睇呀。」

Louisa好想知網民話佢同麥紫莉邊個天邊個地。

坤哥接受電話訪問時表示其實不覺得自己有遭受到網絡欺凌:「我覺得網絡欺凌係指未搞清楚事實就鬧咗先,未了解真相就去攻擊評批,例如之前話個伯伯賣狗肉,同埋台灣一個女生殺人呢類事件。我自己就未到咁誇張嘅地步,只係畀人誤會下,拎嚟做下把取笑下,唔會介意,我已經睇得好化。之前網上話我演唱會請義工嘅謠言係扭曲咗事實,我都費事解釋,當時淨係想專心做好個演唱會。對於網民嘅負評,我覺得係預防勝於治療,唔好做錯嘢。畀網民話係偽毒我無唔開心,我反而覺得光榮,有一個專屬嘅稱號。呢個世界咩人都有,唔理得咁多,都理唔到,自己依家會盡量過濾啲無用嘅資訊。總之做好自己,拍戲唱歌喺演技歌藝上批評我無問題,言之有理我會接受,即係人哋唱歌唔好評批人肥。」

坤哥話佢已經睇化。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。