張繼聰連宣傳都冇份 拍片默認被封殺：多謝大家支持
撰文：洪曉璇
出版：更新：
商業社會中，公司同公司之間有糾紛實屬平常，有問題可以傾，傾唔掂可以用法律途徑去解決，不過原來有時候會連坐法懲罰埋唔係幾相關不過係同公司的人士。去年TVB同蕭定一公司因電影片酬問題打官司，近日忽然傳出要封殺，有份主演熱播中台慶劇《誇世代》嘅張繼聰，連宣傳都唔使佢再去，而佢本人就拍片放上網證實封殺一事。
張繼聰拍片交代被封殺一事，表現樂觀但語帶無奈。(影片截圖)
張繼聰喺23號晚上，於Facebook上載53秒短片，親自交代被封殺一事：「大家好！今日出咗單新聞之後，好多謝大家嘅支持，咁可能嚟緊有一段時間唔可以再喺將（軍）澳出現…有啲說話都想喺度交代。首先喺過去嘅日子好多謝TVB嘅栽培，畀咗好多機會我，好多謝珍姐（曾勵珍）。入面好多台前幕後嘅兄弟姊妹，好多謝你哋，俾咗好多美好回憶我。」雖然無辜被封殺，但阿聰依然表現樂觀，話會隨遇而安，仲呼籲大家要繼續支持《誇世代》。
好多網友留言力撐張繼聰，仲話罷睇TVB，阿聰仲留言叫大家唔好衝動睇埋《誇世代》先。(網上截圖)
呢次封殺可謂毫無先兆，本月16號張繼聰仍有出席《誇世代》宣傳，大玩體能活動，21號無綫其中一個Facebook Page「See See TVB」，於晚上9點仲上載一條張繼聰拍攝嘅花絮片段，點知24小時都唔夠就傳出封殺新聞，只能講句，真係好難捉摸呀！
21號晚9點，TVB其中一個Facebook page，上載一條張繼聰為《誇世代》拍攝嘅宣傳片。(網上截圖)