【港女講感情】靚仔壞男人已失叫座力 天然呆馬國明先係最佳男友

撰文:
最後更新日期:

喺好耐好耐之前,潮流仲係好興「男不壞,女不愛」,總之個男仔對你越衰,成日蝦你鬧你,然後畀10舊屎你再請你食1啖砂糖,「霸氣總裁咁就最吸引」,最有代表嘅就梗係《流星花園》嘅道明寺,長拍長有,拍完台版、韓版、日版,之後再拍多次台版Version 2,你就知女仔係有幾Buy!其他壞男人做賣點嘅《惡魔在身邊》或者《惡作劇之吻》都紅到爆炸,總之姊妹們就係鍾意被虐,最好就好似格雷咁鞭打我。

壞男人絕對係上個世紀嘅產物。(網上圖片)

但時代變,大家嘅口味都跟住變,依家大家唔興被虐,反而個個都想做娘娘被暖男追,最好就好似《我可能不會愛你》入面嘅大仁哥咁,淨係鍾意你一個,默默守候你身邊,只要你需要佢會隨傳隨到喺你身邊支持你。所以近年一直都流行韓劇,劇情唔需要好花巧,反正點都加個暖男就得架喇。

其實唔需要轉台去韓國,我哋香港都有個代表,就係近期拍《降魔的》升咗上神檯嘅馬國明,佢係絕對係少有筍盤。佢真人就好似劇中「馬季」一樣平民貼地,平時興趣就係打機上高登,閒時就陪屋企人行吓街買吓餸,完全好似套劇咁,陪心姐(謝雪心)家庭樂。馬明即使上咗位,但亦唔會亂使錢,皆因佢嘅興趣係儲錢,覺得有錢揸手最實際,各位姊妹係咪聽到都想畀個Like佢。

+6
+5
+4

《降魔的》入面嘅馬季,同馬明本身嘅性格好似。

+6
+5
+4

其實壞男人已經係退流行,好似《幕後玩家》嘅Bosco(黃宗澤)咁,有老婆都仲搵小三,就算幾靚仔都冇用,都被網民鬧爆。又好似近期同馬明爭視帝嘅王浩信咁,Signal Wong喺外型同演技都可以話完勝馬明,但觀眾就一面倒支持馬明,仲話如果唔係馬明攞視帝就要罷睇TVB咁話。無他,Signal Wong傳過偷食,之後仲斷正被傳媒偷拍到佢同達哥神秘消失幾個鐘,就算演技好都唔想投票畀你啦。相反,馬明踏踏實實,咁多年嚟都做個老實人,最多都係上雜誌爆過自己有睇AV,宅男就係有呢樣好,你最多都係怕佢買一堆Figure砌又或者偷偷哋課金新Game,好過驚怕佢搵PTGF,因為你就係佢哋全世界,宅男悶有悶嘅好,起碼有安全感唔使擔驚服怕。

馬明絕對係最佳男友!



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。