【溏心風暴3】岑麗香至索千金出場　都唔夠翠如BB臨尾3秒吸睛

卡士陣容鼎盛的無綫50周年台慶重頭劇《溏心風暴3》今晚播出第二集，既然有咁多演員主演，頭幾集就當然是要安排重要的角色一個個登場啦，而今晚就輪到索爆人妻岑麗香 (香香) 出場喇。香香在劇中飾演的許貝兒跟她本人一樣是靚女一名，身為千金小姐的貝兒細細個就留學英國，畢業於名牌大學，有學識又有樣貌，同香香一樣是美貌與智慧並重㗎，仲散發出一份甜美氣質，所以香香做呢個角色真係好合適。

以下內容少量劇透，逃生門在此。

第二集大部分的劇情都係想當年，講返以前的事，而貝兒最初出場時，就是講她與王浩信飾演的黃圍家邂逅一幕，不過兩人都是小朋友版，由小演員負責。TVB今次起用的兩位小演員與王浩信和香香的樣貌都有幾大落差，雖然兩個小演員都好可愛，但跟浩信香香兩人真係一點都不似，似乎說服力欠奉。

劇情方面就講述童年時的浩信在香香家的豪宅拜年時，無意中走到了香香練習彈豎琴的房間，當他一望到香香個靚樣即刻對香香一見鍾情。而就是因為這次的邂逅，他自此一直暗戀着香香，即使香香之後已經飛往英國留學，兩人多年來亦未有再見過面，浩信依然沒有對她忘情，好情深呀。

不過，成集最精彩的一幕並非香香出場，而是片尾的3秒，呢3秒有咩睇？就是有超性感的翠如BB (黃翠如) 白滑美腿一雙喇，翠如BB好少露咁多㗎，大家千其咪錯過。最尾一幕是講飲醉酒的黃宗澤上了好友翠如BB屋企，翠如BB開門給他，鏡頭一轉已見翠如BB睡在床上，露出誘人美腿，而黃宗澤就準備攤上床跟她一齊瞓，好似要生擒翠如BB咁喎，好想知下集會發生咩事呀。