【廚神出動】謝霆鋒壓軸現身米芝蓮晚宴 大騷高速畫花神技

撰文:
最後更新日期:

要形容動作有幾快,以前會話係「摩打手」,近年會話好似「葉問一打十」,來到2017年尾大家又可以學多一個新形容詞:「謝霆鋒整甜品咁快」近年專注鑽研廚藝嘅謝霆鋒,以七大星級名廚身份第二年受邀出席米芝蓮晚宴。之前佢喺Facebook上載一段整甜品嘅片段,霆鋒兩隻手分別拎住黑白色朱古力醬,以神速於甜品碟上在擠,快到無影,成段片幾乎cap唔到一張唔鬆郁濛嘅定格,認真誇張。

呢張截圖已經盡咗力,謝霆鋒對手實在快得太誇張啦。(影片截圖)

謝霆鋒親手製作嘅甜品「薔薇之約」。(微博圖片)

呢次米芝蓮晚宴於澳門舉行,7位名廚共擁有21粒米芝蓮星星,而霆鋒雖然無星,但佢係世界首位米芝蓮之友榮譽嘅星廚,壓軸出場絕對係理所當然。晚宴主題係「回憶」,霆鋒喺Facebook上載嘅片段,正正就係整緊呢晚嘅甜品「薔薇之約」亦即係「玫瑰泡芙及荔枝啫喱,玫瑰花瓣及香芹籽麵包條」。霆鋒於晚宴上即席揮毫展現甜品製作過程,以藝術塗鴉形式,急速隨性繪製餐盤,效果就如畢加索一樣睇唔明,配以激蕩人心鼓樂,單係睇表演都值回票價。型就的確好型,但擠到成枱成地都係朱古力醬,辛苦清潔人員啦。

謝霆鋒擁有世界首位米芝蓮之友榮譽,大合照企正中間亦屬正常。(視覺中國)

狄波拉同老公都有到場支持霆鋒,仲舉起手指公大讚好食。(微博圖片)

一次整500份一式一樣嘅菜式,絕對考功夫,睇到呢張相有種療癒感覺。(視覺中國)

入行超過20年登上無數大大小小舞台,不過霆鋒就話自己呢次都非常緊張,因為首次製作500人份量食物,創作過程嘗試過百次,特別提早5日到澳門熟習廚房。霆鋒亦喺台上分享點解會揀選泡芙呢款甜品:「泡芙係我學做嘅第一款甜品,那時候聽人說,泡芙是很難弄得好的一道甜品,我不相信就想挑戰,於是上網看了製作過程,當下便去購買了食材,回家弄半天,弄出來的成果醜死了,那個對着一堆失敗的泡芙哭笑不得的畫面至今仍記得。」試咗咁多次之後,呢500份「薔薇之約」當然靚靚登場,望住霆鋒極專注chok爆表情,令人賞心悅目,份量雖少但足以飽晒。

話晒係chok爆廚神,謝霆鋒嘅廚師服都有別於其他星廚,深藍底色金黃流蘇,非常搶眼。(視覺中國)

+8
+7
+6


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。