【Do姐再Shopping】陸永手繪瓷器慘遭Do姐反擊：畫到一pat 茄咁！
《Do姐再Shopping》上星期首周播出，好快就已經被網友熱烈討論，Do姐同兩隻「卡啦蘇」農夫同黃翠如去完日本之後，昨晚就去到新一站丹麥，仲有今屆視帝熱門人選馬國明同行。其實馬明在前年的《Do姐去shopping》已經有陪佢地去英國旅行，當時馬明都好乖仔，仲氹得Do姐好開心！當然要講轉數，馬明一定唔夠農夫快，但就做足功課背得出每個景點嘅資料，獲do姐激讚，看來她都好鍾意呢種「天然呆」。但大家睇咗咁多集，知唔知《Do姐再Shopping》有咩指定動作呢？就係「介紹，指同入去」，被陸永稱為做「Do姐三寶」！
昨晚丹麥篇其中一節就帶大家到皇家御用瓷具店，原來一眾主持有即場大顯身手，跟住首席畫師學手繪瓷器，雖然未有放在節目中，但就被節目「組上載片段到Facebook。農夫又點會同你乖乖地畫瓷器，過程中當然係要瘋狂狙擊Do姐喇！事緣Do姐為瓷器上的圓圈填色，不幸畫出界，就被陸永提醒。點知反被Do姐話，「你而家好巴閉呀？淨係識話一個圓圈。你唔洗咁多解釋，畫得唔靚就唔靚。」陸永聽完都覺得好冤枉，唯有繼續乖乖畫。 Do姐點會咁容易放過農夫呢？佢指陸永就話，「你畫得好肉酸呀，畫到一pat 茄咁！」在旁的C君同馬明都忍唔住放聲大笑。最後他們都有驚無險地完成作品，陸永一見到do姐嘅照片就話，「好似黃金葡萄球菌」，搞到do姐聽完都忍唔住笑。
但成個過程中，一定要係馬明一粒聲都無出過，全程都十分專心地畫畫，大部分時間在適當嘅時候笑下咁，尤其是農夫被Do姐狙擊同埋農夫搞爛gag嘅時候，例如Do姐探訪一間面積只有156平方尺的美容店，馬明就指店鋪好似骰子，仲被Do姐大讚好聰明！點知C君又加把口，「我都好似骰咁，長寬高都一樣！」但他呢番自嘲就被Do姐話，「但你唔可愛呀嘛，係咪先！」馬明係旁邊又係得個笑。基本上馬明係節目中嘅角色就係負責「陪笑」。唔少網友都話「馬明唔識串返農夫好好笑」、「馬明真心天然呆」。可以有留言話有啲掛住上篇去嘅黃翠如，覺得佢地先有火花，但其實馬明就係因為有種天然呆嘅特質先令到咁多fans鍾意咋嘛。