【誇世代】張繼聰CUT收費電視被刁難 網友大讚有共鳴

撰文:
最後更新日期:

台慶劇《誇世代》一早講明,向以前的經典劇集致敬,每一集都有啲場口大家會覺得熟口熟面,但原來唔止致敬,呢套劇仲會不停抽水添。最新一集中,張繼聰攜同機頂盒,到收費電視客戶服務中心要求中止服務,被笑容可掬睇落好幫手,但其實百般刁難嘅CS小姐玩到氹氹轉,仲有個客拎刀出嚟要CUT台﹗咦?呢一幕好似係友台經典場面嚟噃﹗

呢個角度睇,張繼聰去X線電視要求CUT台,又被百般阻撓,熟口熟面噃。(影片截圖)

劇中張繼聰去到「長線電視」客戶服務中心,排完一輪,一坐低就遞上機頂盒及身份証,向職員表示想中止合約,估唔到惡夢剛剛先開始:「先生,跟機頂盒嗰條線呢?HDMI線呀,先生如果你無帶嗰條線嚟,我無辦法幫你取消服務噃。(我留部機頂盒喺度,依家返屋企拎條線)先生你要取消服務要填份FORM先。(麻煩你俾份FORM我填)表格我哋無㗎,你需要上我哋官方網站,喺上面Download落嚟填㗎。」

有盒話無線,有Form但無得提供,張繼聰都不禁由好聲好氣,變成提高聲量質問:「你哋煩唔煩啲呀﹗當初氹我簽約時隨意簽名就得,依家我要CUT台就多多要求,九十幾萬樣嘢。總知今日我一定要CUT台。」點知又被告知要提前兩個月通知,激到張繼聰生蝦咁跳。

正想理論之際,隔離嘅客人已經拎把菜刀出嚟大鬧:「我已經跟足你哋指示做都話唔得,我忍夠啦知唔知呀,又冇英超,又冇西甲。」仲拎出一個疑似火水樽點燃想同歸於盡,令人不禁諗起3年前有男子持雙刀到有線電視要求CUT台一事。睇到呢場戲,電視機前觀眾們都應該身同感受,安裝易CUT台難,拎齊配件又話無Form,寄又唔肯收,開放時間又唔長,早在8年前已經有條「"希特拉" 都取消唔到有線合約」嘅二創片段流傳,《誇世代》呢一幕播出後引起大批網友共鳴,大讚呢一幕真係靚抽呀﹗



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。