10年糟糠正式被棄 九把刀同新歡周亭羽拉埋天窗
撰文：李妍樺
出版：更新：
憑青春電影《那些年，我們一起追的女孩》一炮而紅的九把刀，身價翻個幾倍，名利雙收之後再獲注資接拍多部電影，人紅之後就自然是非多，男人有錢亦開始身痕，常言道：「十個男人九個滾」，九把刀有名你叫，「九」嘛，佢咪第9個囉。本身《那些年》入面沈佳宜同柯景騰係個童話故事，兩個人都為默默耕耘，就算Long D都日日打電話Keep，總之就係可歌可泣，九把刀自己聲稱係真人真事，佢自己都有個「沈佳宜」追咗佢8年，呢個被大家歌頌嘅故事喺被佢自己親手攪和。
九把刀多次話前女友小內係「真愛」，但10年感情最後都係分手收場。（網上圖片）
2014年本身係佢嘅全盛時期，但同年佢就被狗仔隊影到佢帶住中視前記者周亭羽上時鐘酒店，但嗰陣時佢係有個拍咗施10年嘅女友叫小內，即係陪佢捱窮捱咗好耐，九把刀自己都話女友係真愛諗過結婚。但可惜，世界上係冇貓唔食魚，有得食唔通唔食咩，偷食被人捉到斷正，當時九把刀仲開埋記者會認偷食，仲話已經斷纜，仲求女友原諒。點知，世界最難敵得過嘅就係小三，一年都未夠，九把刀就正式棄糟糠，同小三周亭羽一齊，仲一齊住入本身同舊愛築嘅愛巢。本身諗住九把刀都係玩吓就算，點知前幾日有網民爆料話見到九把刀同周亭羽辦理手續登記結婚，講到似層層，今日經紀公司證實如果真係結咗婚。
九把刀同周亭羽正式登記結婚。（網上圖片）
原來糟糠只可以共患難，唔可以共富貴，諗起都Sad，有咩理由遲嚟先上岸，被小三上位坐正做老婆？公平咩？明明同個男人捱咗咁多年，等到終於捱出頭，就被第二個女人搶咗個功勞，算啦，因果循環，相信就算周亭羽做咗「九太太」之後，日後都係會擔驚受怕，遲早都會有第2個周亭羽出現，男人，始終都係信唔過……
天下男人都一樣。（網上圖片）