鹿晗認愛後更有商業價值 趙麗穎靠《楚喬傳》贏楊幂
撰文：鄺鈺瑩
出版：更新：
鹿晗的微博坐擁4千萬大軍，代言由手機、連鎖快餐店、運動品牌都有，公開認愛完全未有影響人氣！（網上圖片）
大陸雜誌《第一財經週刊》日前公布「2017中國明星商業價值榜」，呢個榜主要嘅計算方法係通過媒體活躍度、代言力，以及《福布斯》名人榜和收入榜數據去衡量明星嘅商業價值。頭5位分別係鹿晗、趙麗穎、楊幂、范冰冰同周冬雨。
鹿晗同趙麗穎進駐「2017中國明星商業價值榜」第1、2位，而范冰冰就連續兩年都係第4位。（網上圖片）
先講鹿晗，今年因公開認愛而成為熱搜人物，單係認愛一條微博文章短短幾小時已獲120萬次轉發、280萬條評論，最後更癱瘓微博。而認愛後，鹿晗雖然令唔少粉絲心碎，但就繼續係各大品牌寵兒，最近更與舒淇合作電影《上海堡壘》。至於趙麗穎，佢主演的《楚喬傳》，點擊率超過400億次，電影《乘風破浪》、《密戰》亦有口碑有票房，再加上多個國際品牌代言在手，令佢由去年的第8位，躍升到今年的第2位，成為女星之首，力壓楊幂、范冰冰等人，果然係後生可畏。
趙麗穎同Angelababy今年先後成為Dior代言人，但趙麗穎就因為有《楚喬傳》而人氣高企。（網上圖片）
而去年因《琅琊榜》而排行第1位的胡歌，高峰時期曾有30個代言品牌在手，不過，今年因要到外國深造而息影跌至第6位，但都算不過不失。反觀去年女星之冠的Angelababy，就由第2跌至第15位，而台灣代表周杰倫，似乎亦唔夠一班小鮮肉玩，由去年第6位跌至18位。不過，講到升幅最多嘅，一定係由去年的第23位直升至第3位嘅楊幂，今年單係一部《三生三世十里桃花》已經贏開巷，而首次上榜的周冬雨，就已經進佔第5位，都算幾厲害！
吳京因《戰狼Ⅱ》而名利雙收，更首次上榜，排第8。（網上圖片）