張景淳剛取TVB十年金牌傳離巢 飛機哥：覺得我有價值先會講
撰文：洪曉璇
出版：更新：
2011年《天與地》嘅家明，令大家留意到張景淳呢位演員。(網上圖片)
提起張景淳，除咗《天與地》嘅家明，今年仲多咗一套《使徒行者2》嘅飛機哥，比起好多窮盡一生將青春奉獻俾演藝嘅演員，張景淳總算有接二連三，有名有姓有發揮嘅角色，點知忽然傳出佢約滿離巢嘅消息，莫非有好路數北上搵真銀？張景淳接受《香港01》訪問時就話：「剛剛拍完一組戲宜家過廠開《都市閒情》喎，我都覺得好得意，到底邊度傳出嚟架？」
呢張係12月11日下晝3點嘅截圖，WIKI的確寫住佢喺12月約滿，但呢個網人人都改得，你懂的……(網上截圖)
其實10號中午張景淳有喺TVB Check in，寫住working sunday，唔係返去執嘢噃。(張景淳Facebook)
依家網上好多所謂吹出嚟嘅風，好多時源自維基百科，的而且確截至11號下晝3點，WIKI真係大大隻字寫住「張景淳2017年12月與無綫電視結束合約」。現年36歲嘅張景淳剛剛先拎咗TVB十年金牌，今年又有飛機哥呢個好角色，呢個時候離巢的確有啲吊詭。張景淳接受《香港01》訪問時就話：「尋日IG都有人留言問我，其實我同TVB份約仲未有耐完，真係仲有排，所以真係唔知點解咁傳出嚟。」
要拎到呢個十年服務金牌一啲都唔容易，好在張景淳夠童顏，點睇都唔似36歲。(張景淳Facebook)
消息傳出不足24小時，討論區已經過百留言，有網友揣測張景淳忽然入咗《都市閒情》做主持，似係還騷債，原來又係一個天大誤會：「其實我一路都有做《都市閒情》監製嘅節目，好似《文化新領域》，因為十年前讀完藝員訓練班出嚟，佢已經有搵我拍嘢，一直都有KEEP住合作。《都市閒情》每星期都可以KEEP住返公司拍攝，即使無戲開都可以保持Active，一個藝人最重要就係保持狀態。」
「我覺得公司一直都俾緊機會我，今年有《使徒行者2》，嚟緊有機會拍《十兄弟》，依家就拍緊《開心速遞》，18號就會播出我嘅第一集出場，我都好鍾意呢個角色，覺得好有發揮。其實有呢啲(離巢)傳聞都幾好呀，証明有人留意到自己，覺得我有談論價值先會講，無傷大雅都幾好呀。」
張景淳剛入組拍攝《開心速遞》，18號就會出場，睇呢一身造型似乎係青年才俊噃。(張景淳Facebook)
+11