【性在有情】張兆輝快餐店傳授性教育　解釋Condom用法嚇窒街坊

喺香港呢個文明社會，先似開放自由，但有啲詞好似佛地魔個名一樣，一講出口大家就會定格，大家都避之則吉，其中一個就係「性」。拍咗成年曾經喺my TV SUPER播放嘅《性在有情》，終於喺翡翠台首播，當大家都在留意有幾多床上戲激情戲時，有無諗過從中學習點樣正確面對性教育？就好似張兆輝喺戲中所講：「正確嘅性知識係好健康嘅，唔使怕，唔明就問。」

戲中飾演社工嘅張兆輝，與性治療師女友陳敏之，同一般香港人一樣，面對想交歡又無地方嘅困境，難得等到家中無人可以翻雲覆雨，但唔小心漏低一個避孕套，俾就讀小學嘅囝囝拎返學校當水球玩，仲要掉中老師個頭，唔使問當然就係要記過兼見家長。普遍香港家長，應該會大鬧小朋友，不過張兆輝同陳敏之就反問老師「小朋友只係好奇，點解要記過。」仲勸老師應該及早向學生灌輸性教育。

講就容易，識得實行嘅又有幾多個？戲中張兆輝就喺快餐店即席同囝囝解釋何謂Condom：「避孕套其實係俾男仔同女仔發生性行為時所用。（咁咩叫性行為？）你有無睇過非洲動物紀錄片？性行為就好似非洲大象交配一樣……（咁男仔點解要用避孕套？）一方面用嚟避孕，另一方面可以防止喺性行為中感染傳染病，但即使你用咗Dom Dom，都唔可以隨便同異性發生性行為。（咁避孕套入面裝咩架？）當然唔係水啦，係用嚟裝男仔嘅精液，等精子唔能夠游到女仔嘅卵子結合。」

呢一段性教育講解簡單易明，不過大部分人都好似張兆輝身後嘅家長一樣，不停逃避，蓋住小朋友耳仔唔俾聽唔俾問，最後仲雞飛狗走。其實小朋友都係想得個知字啫，吓吓避忌淨係話「大個就會知」，倒不如持開放態度灌輸正確觀念啦。