【收視分析師】《溏心3》收視就快1字頭 不如轉睇KC送飯

撰文:
最後更新日期:

見到菊姐鬧人,就會講不出聲。

由於菁姐上個星期有大斬獲,本周極速到日本遊埠風流快活,各位唔使緊張,今個禮拜唔好畀佢停,依然有「收視分析師」,就由客席主持繼續為大家講下收視。一打開張收視表,見到《溏心風暴3》第二個禮拜低見21.5點,就快同長線投資劇《愛.回家之開心速遞》同Level,都真係唔看好㗎,而《誇世代》繼續喺23點徘徊又折返。唔,睇到呢個走勢其實一啲都唔意外。

見到呢個收視,各位師兄點睇?

收視低收嘅原因,都不外乎TVB老是常出現嘅問題,以為食老本就無死。當時間好似光速咁萬馬奔騰,人類成日都提住「Life must go on」嘅時候,《溏心風暴3》keep住十年如一,幾掏心掏肺嘅爭產劇,都會變得太離地太抽身。當尹光早排都改唱freestyle嘅時候,TVB先喺2017年講潮語,事隔一個Generation先至「有請小鳳姐」,後生個班睇完冇感覺,一班固有嘅觀眾就好似睇完WhatsApp唔想覆咁,已讀不回直接藍剔。而且有幾可身邊嘅人真係為咗杯奶茶爭家產?今次險勝《開心速遞》0.4點,都唔應該覺得好彩。俗語有云:「續集必須死。」《溏心2》收視好畀你有番個尾彩,但收視呢家嘢就好似投資咁,記得見好就收,諗下有啲咩新花款,分分鐘仲多紅利呢。

睇《開心速遞》仲頂癮喇。

有人可能會問,咁兩套台慶劇咁啱都要走勢放緩,咁仲可以睇啲咩呀?嗱,好嘢永遠都係背後默默等緊大家嘅,就好似Shopping咁,買咗又覺唔等使,但有時候先會覺得佢好鬼重要。就好似《開心速遞》咁,晚晚返屋企食飯都見到同一班人,係就係悶啲,但呢套劇做嘅嘢,講嘅對白就好似日用品咁,最貼身最有共鳴。有陣時有意思嘅劇,唔使食完飯睇,要諗晒嘢先叫好嘅,食住飯同屋企人睇,有時話題一撃即中,咁樣打開話題,咁樣咪仲好!《開心速遞》就好似藍籌咁,最啱愛嚟放長線,擺喺度紮袋。不過隨住風少、欣欣離開,股價可能會有變動,但相信問題不大,至少仲有KC同Terry呢pair笑下,可以一試咁囉!

+5
+5
+5


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。