【獨家．#MeToo】苑瓊丹曾遭性侵　內地登台受害：我大聲疾呼

見到苑瓊丹，就會諗起「風華絕代萬人驚艷」的石榴姐，想當年在《唐伯虎點秋香》問醜字點寫，真係好經典。不過，別被她在電影中的造型影響，早前備受關注的娛樂圈女星性侵事件，原來「石榴姐」都有遭遇過，對方更是明目張膽。

苑仔聽到這個話題，說：「啲人同我講呢個話題，多數會話：『苑仔，我唔係問你有冇被人性侵，我係問你有冇性侵過人。』啲人覺得我係嗰啲人囉，咁其實我當然係試過喇！」此時苑仔已開始咬牙切齒。

她憶起在內地登台的時候，眾目睽睽之下被人當眾侵犯的遭遇：「有個男人上台直程…（做出摸胸手勢），之後我就一腳踢咗佢落台，然後我就話：『嗰個色狼頭先摸我呀！打佢！』因為我唔係嗰啲畀人侵犯而唔出聲嘅人嚟，我係大聲疾呼嘅，所以其實性侵我係冇着數嘅。」對方不論是甚麼身份，苑仔只要覺得唔對路，咩人都冇面畀，「保護自己係最緊要！」

除了內地，苑仔在香港試過被跟蹤：「以前細細個，當時得得意意咁，見到有人跟蹤我返屋企，我之後擰轉面瞪大眼啤佢，佢就驚到掉頭走。」苑仔自我保護意識好強，試過一次類似經驗，往後她就用辦法防止別人非禮：「搭巴士我手揸住大頭針，擺喺自己面前，你咪挨後啲囉。」

不過講完相關經歷之後，苑仔又講笑自嘲：「好多人都問我返大陸成日拍戲，你驚唔驚呀咁？我就話國內咁多靚女，搞都唔搞我喇！幾廿歲仲搞你咩，貪你驅風咩！」但無可否認以前苑仔都幾吸引嘅！

其實之前爆出女星性侵事件，讓大眾知道原來會有監製、導演會做出如此行為之外，女藝人在內地登台都有隱憂，因為總會有人過分熱情，對人毛手毛腳，有些女星試過硬食。就好似張文慈十多年在內地登台，試過被人從後熊抱，過分肉緊以致跌落台。除此之外，陳靜（DaDa）登台後離開之際，有人突然博懵，DaDa即時打了對方一巴。由此可見，這些經歷在內地登台是屢見不鮮。