娛樂圈真心愛狗英雄　陳彥行為狗仔變賣家產　河國榮花幾十萬醫狗

最近最紅就係電視劇《降魔的》，仲上埋Google 2017十大本港搜尋排名，入面扮神棍「宋日基」嘅曾偉權私底下係個救狗英雄，原來佢一直都做咗好多年動物義工，平時唔使返工嘅時候，佢會半夜喺街捉流浪狗，幫佢哋做完絕育，仲身體力行收養成5隻狗。對於喺街上流離朗蕩嘅流浪狗，曾偉權認為淨係餵街狗係唔夠嘅，佢覺得絕育先係最治本嘅方法，如果唔係流浪狗不斷生，問題只會越滾越大。咁都唔止，時不時都見有狗仔係馬路上唔小心被車撞死，曾偉權除咗怒斥政府未有立例規管肇事司機之外，佢仲會為流浪貓狗善終，幫動物執拾屍體同火化，「雖然每一次見到心情都好難受，但處理完後心情都會安落，至少可以令動物有尊嚴。」

而最近在凌晨時段重播的《皆大歡喜》裡的行姐（陳彥行）雖然表面巴渣潑辣，私底下都係個愛狗之人，自己養咗兩隻，但喺網上知道大陸流浪狗慘事之後，竟然誇境領養3隻狗返香港。平時佢一得閒就會喺街度餵流浪狗，狗糧狗飯都係一筆好大開支，行姐不惜變賣自己嘅首飾名牌捐畀慈善機構。佢自己嘅狗仔有白內障同青光眼，要換晶體同做假眼，前前後後使咗成十萬手術費，佢話嗰陣幾乎同媽咪反面，「不過錢都係其次，雖然話有愛心，但都要盡力而，如果唔係喺自己能力範圍之內，對寵物都係辛苦。」行姐近年仲主動呼籲大家關注動物權益，除咗反對非法寵物繁殖，將動物商品化之外，仲話要成立動物警察。

大家可能少見近年離開咗大台嘅河國榮，早排同隔離台拍咗個叫《守護毛小孩》嘅節目，入面講佢原來早喺十幾年前已經有收養流浪狗，高峰時期曾經試過一年收養9隻狗。可能因為佢太太身體有問題唔可以生仔，狗仔對河國榮就好似佢自己嘅親生囝囡一樣，雖然狗仔好多隻係收養返嚟，好多病痛，好似骨癌、腦退化、哮喘乜都有，但河國榮從來都冇因此而棄養，做一次手術嘅手術要成9萬蚊，佢形容養狗嘅錢都夠佢買兩部寶馬，但佢都會繼續堅持：「只要佢繼續有呼吸，我都唔會去結束佢嘅生命。