【任噏亂評】Google揭露最赤裸真相 鬧完咪又係睇返TVB!

撰文:
最後更新日期:

大家見到呢個表有咩感覺?

而家呢個世代,好多網民似乎會不屑收睇TVB劇集。講起大台,主要都會講幾句對白:「我唔睇膠劇㗎喎!」、「睇韓劇好過喇!」,再唔係每一套劇都會搵錯處,睇下當中有啲咩位係低成本Hea作。再唔係就好似最近《溏心3》咁,見到張海報就話棄劇:「套路照舊,罷睇!」不過,有一種證據叫數字,而數字從來都唔會講大話。最近Google就公布「2017年熱爆關鍵字搜尋排行榜」嘅結果,第一位係呢排人人吹奏嘅《降魔的》,咁都未算!十大排行榜入面,有4套都係TVB劇。內地劇《射鵰英雄傳2017》仲因為TVB播,多咗人搜尋,呢個現象證明咗啲咩?證明咗TVB基本上已經佔據住你嘅生活!係霸權嚟㗎!

《降魔的》爆都算,仲要上埋Google第一位,其實你哋真係好鍾意TVB囉!!

講到呢度,可能有讀者即刻反駁:「我從來都唔睇TVB㗎喎!」呢樣都明嘅…其實好多人都會有「口裡說不,身體很誠實」,就算你唔睇,你見到有網民講套劇有啲咩膠位,今集又死幾多人,就會開始手痕上Google搵。再唔係見到有啲唔起眼嘅演員,喺TVB捱咗幾多年先有返少少成績,你又會走去Search,因為鍾意睇人有幾慘…要搵嘅理由何其多,亦都知道大家係唔會講出口。

而且TVB愈多人口講嫌棄,證明愈佔據喺大家心中。就好似過去三年嘅十大熱搜字排行榜,TVB最盡都係佔一兩套,就好似2016年就有《城寨英雄》、2015年有《張保仔》,仲有2014年《使徒行者》,但2017年就嚟個大躍進,一炮過有4套,有《降魔的》、《不懂撒嬌的女人》、《使徒行者2》同埋《超時空男臣》。唔鍾意嘅理由可以得一個,鍾意嘅理由就好多,Cult、夠小品、夠抵死派膠等等,總之係令到你走去Search囉。再者,身處咩都鬧咗先嘅年代,其實TVB喺大家心目中好重要,而且幾乎站穩住腳囉。

年中播嘅《不懂撒嬌的女人》又係好多人吹奏㗎。

再睇返香港附近,台灣嘅十大熱搜排行榜。當地第一位係第二十九屆夏季世界大學運動會,咁自己嘢支持都好應該吖!雖然台灣嗰邊,娛樂類別佔最多,但唔計韓劇嘅話,台灣咁多電視台,都唔愁冇劇睇,但都都係兩套上榜。相反香港呢?上年多咗個ViuTV,今年多埋奇妙電視,但點解連影都唔見?唔係好期待《詭探》咩?又話Eason套《短暫的婚姻》值得一睇嘅?最後都不敵霸權,選擇投向TVB嗰邊…再一次證明,大台喺大家心目中好重要。

TVB今年真係完全植根大家心中。(資料圖片)

嚟到最後,見到香港台灣嘅十大熱搜榜,了解到呢一帶嘅人都係鍾意消遣娛樂…但台灣都起碼有單當地年度盛事吖…但香港除咗睇劇,Apple出咩機,都應該有其他更本地嘅嘢值得我哋關心㗎嘛。再睇下美國嘅Google十大,最軟性只係手指陀螺同體育賽事,其他都係時事要聞,見唔到iPhone 8、iPhone X…好多人話《權力遊戲》、《怪奇物語》好睇?Marvel電影又有新Trailer?DC電影有幾不濟?Google都見唔到佢哋…嗰榜只見到佢哋眼中真正嘅大事。而香港最重要就係TVB…喺呢個榜學到啲乜嘢?就係唔好逃避真相,事實大家都鍾意睇TVB。

你哋睇下其他地方…



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。