《誇世代》除了陳豪、森美兩位大隻中佬外，其實還有一位小鮮肉，就是飾演Ocean的余德丞，昨晚和10A 麥明詩在摩天輪談情，場面浪漫，但網友覺得這位28歲新晉小生的結實胸肌才是最吸引，雖然他在那場戲已經穿得相當密實，但亦逃不過網民X光眼。

結實肌肉人人想擁有，可惜，這個世界有時就是不公平，余德丞沒有keep fit秘技，他說：「以前做運動員就游成萬米囉，而家我都游2、3千米先夠皮，我諗keep fit秘訣係唔食嘢囉，我化咗妝就唔食嘢㗎喇，因為我費時整花個咀呀，哈哈，下晏三點入廠，8點放飯，我就食幾啖飯，肉就盡量唔掂到汁囉，同埋我真係唔食零食，朱古力、薯片、糖，我係唔鍾意食嘅，我諗係呢個原因啩。（做Gym?)一星期做3日，每次兩個鐘，全身都做，唔會特別focus邊舊肌肉，踢波囉，我呢個星期踢咗4日。（鍾意邊隊？）熱刺，唔好話我鍾意曼聯。」

食極唔肥，正好形容余德丞，最近忙拍BigBigChannel節目《餓底》，雖然拍飲食節目，但都沒有肥，認真令人葡萄，他說：「我唔會忍口喎，我一朝食10個蛋撻，下晏連續食24粒蝦餃，又試過一日食5、6碗魚旦河，因為呢個節目係要話俾人聽好唔好食，如果食一粒就俾評語，就好唔公平囉，呢個節目好有公信力㗎，我堅食哂㗎。」