【亞視復活】亞視自由度大 朱慧敏：可以同其他傳媒合作
撰文：溫菁莉
出版：更新：
正式在明年1月底復活的亞視，雖然今次以OTT網絡電視示人，除了會播出過往亞視的經典節目之外，其實都有新嘢睇嘅。好似藝人方面，曾效力過TVB嘅朱慧敏，向海嵐，曾華倩及王喜等人宣佈加盟亞視。其中朱慧敏(Queenie)接受《香港01》訪問時笑言自己好耐無試過開心到瞓唔著，「我琴晚嘅感覺好似小學生，聽日要去旅行咁興奮！」
去年5月離開TVB的Queenie對於今次加盟亞視，佢話係開心價。(陳順禎攝)
去年5月離開TVB的Queenie指是因為受一班高層獲邀加盟，「今次亞視嘅管理層都係以前係舊公司睇住我大，有啲甚至帶我入行嘅人，佢地一邀請我立刻義不容辭，諗都唔洗諗即刻應承。」咁有義氣當然係值得讚，咁酬勞方面又點呢？她笑言搵錢固然重要，「簡直係開心價，但最重要係可以同一班咁有經驗，對演藝事業咁有熱誠嘅前輩共事，一定學到好多嘢。」至於合約方面Queenie就話自由度非常大，「以我為例今次係做節目主持人，但同時我可以同其他香港媒體合作拍劇咁。(收入大增？)其實係好開心，因為咁樣先俾到演員同主持人空間。」她其後亦有透露新節目將於每周三與觀眾見面，同大家講下扮靚心得！
今次新亞視人除了有朱慧敏之外，仲有曾華倩、樂瞳、梁思浩、李麗蕊及陳彥行。(陳順禎攝)
劉錫賢可以話係亞視logo之一，佢就話份合約好清楚列明可以同其他傳媒合作。(陳順禎攝)
有新將加入當然要有亞視舊將喇，就好似劉錫賢咁，對於今次亞視開機佢都好激動，「經歷呢年幾嘅時間，我發覺好多市民都好懷念亞視，見到我都問我亞視幾時開台。」他指如果亞視去年唔係因為停播，自己亦為亞視服務了30年。其後提到去年亞視熄機，有不少藝人例如袁文傑，蔡國威等人紛紛加盟TVB，他聞言後就表示有同佢地講過，「我成日都講只要TVB肯放人，我地亞洲電視係無任歡迎同佢地合作，放人唔係話放走佢地，而係俾佢地同我地合作。」提到早前他在ViuTV拍攝《詭探》演技備受觀眾大讚，今次加盟亞視會否受影響，「今次份合約好清楚列明可以同其他傳媒合作，所以唔會有障礙性。」