【樂視清盤】曾贊助李克勤每月睇英超　以後睇曼聯唔通又要翻牆？

「樂視香港」日前入稟法庭申請清盤，大家最留意肯定是樂視嘅體育Channel，唔知「樂視體育」會唔會受影響，究竟買咗超長命50年會籍嘅會員點算？當年樂視以「天價」31億元購入3季英超播放權，仲連NBA都有睇得，所以近幾年樂視入屋率相當高，唔少人都因為月費平而轉會睇樂視。而香港講睇波，不得不提「真魔粉」李克勤，基本上係人都知佢係曼聯死忠，當年曼聯嚟香港佢仲親手整禮物去送畀人，禮物就畀人放咗喺更衣室，而「送禮勤」呢個名就被大家講到依家。

李克勤時不時都喺Facebook Share自己睇波心得，讚下自己愛隊曼聯有幾威水，但有一次唔小心打卡Cap自己睇波，畀網友發現李克勤睇嘅竟然係翻版嘅直播Link（Broadcast），明明足總盃係樂視獨家播放，克勤被大家鬧爆佢搵咁多錢都唔捨得畀4舊水港紙睇波，仲笑佢可能因為係TVBuddy先唔買樂視。

事後克勤就解釋因為佢當時唔係香港，先至唔可以用樂視睇波，仲話其實因為做完歌唱比賽節目《我是歌手4》之後，樂視一直都贊助佢每個月嘅睇波月費，仲送埋部電視機畀佢添！但而家樂視香港話要清盤，咁克勤點算好？今年曼聯個勢咁勁，迪基亞fit到爆炸，單場撲救14次，緊隨曼城排第2名，極有機會爭奪英超冠軍，唔通克勤又要上網搵鬼Link睇波？