【早霸王】酒吧失身3日閃電示愛 結局連森美小儀都絕對估唔到!

撰文:
最後更新日期:

每逢一到星期五這個日子,就知道是《早霸王》表白環節《你知道唔知道有人掛住你》的時候,今朝早有男聽眾子浩打電話上嚟搵森美小儀幫手示愛,佢就話:「早兩日喺酒吧度同班朋友飲嘢,咁就識咗個新朋友,大家飲醉咗,果晚同咗佢過夜。」森美聽完之後打個突,搞笑咁話:「邊間酒吧?有冇搞錯!封查咗佢!」但等陣先,先兩日咋喎,愛情會唔會嚟得太快啊?子浩說:「聖誕啊嘛,嗰日起身大家當冇事,喺佢屋企走,佢係自己住嘅。」

森美就話自己平時係冇去開酒吧。(網上圖片)

+5
+4
+3

子浩表示之後都有同佢Keep住Send訊息,好似普通閒偈咁傾,冇特登傾返嗰晚嘅事,森美就追問究竟佢哋兩個傾啲咩:「你走嘅時候有冇問今晚得唔得閒,又或者晏晝Send訊息話掛住佢,問佢今晚原來得閒食唔食餐飯,咁做先知你對我有意思,要有呢個行動,如果你冇做就擺到明完咗當唔識!」但小儀都忍唔住問今日先係第3日,你今朝早就約佢,會唔會太快啊!森美都加把口講:「你咁快打電話畀佢同佢示愛啊?你中間咩都冇經歷過喎大佬,真係多鬼餘!唉,你真係,你哋第一晚咩都發生過你地都咩啦,可能係我個人真係Old-fashioned啲。」

但子浩並冇被森美小儀動搖到,佢堅持自己嘅想法:「我想同佢一齊囉,想同佢過聖誕,想今晚約佢食飯。」原來今次係子浩咁大個第一次一夜情(One Night Stand),森美隨口問一句:「第一次One Night Stand就鍾意人,你屬咩㗎?桃花咁旺嘅!」點知竟然引到子浩爆料話自己原來冇拍過拖,森美同小儀兩個人都嚇到不停嘩嘩聲,森美話:「未拍過拖咁大膽嘅,你嘅One Night Stand咪你嘅第一次,你真係好刺激喎!會唔會太快啊!我建議你真係唔好打畀佢,你咁快打畀佢好大件事喎。」

小儀都覺得子浩進度太快。(網上圖片)

+2

子浩就好希望今年有人陪佢過聖誕,仲話唔成功的話,就想森美頂上同佢今晚食飯,森美見佢咁主動積極,就即刻幫佢打畀女神表白啦,電話接通,係把男聲嚟嘅,小儀愕然再問一次:「喂,你好,我想搵阿真,係,我想搵阿真。」原來阿真係個男仔,「阿希事件」再次出現,森美小儀笑到出唔到聲,後尾小儀平伏返情緒就話:「聖誕快樂!呢度係電台打畀你,我係阮小儀。」而森美都係改唔到佢嘅刻薄口吻:「你去開邊間酒吧,我少啲去,我意思係我唔去酒吧,飲酒冇益。」最後子浩直接就問阿真可唔可以同佢一齊,而阿真亦好順攤應承咗,事後森美回憶道:「唔怪得之佢想同我食飯啦,你哋改名可唔可以唔好咁中間得唔得啊?叫阿真都有!大家最緊要唔好飲醉酒,平安夜要睇住自己嘅身體,唔係個個好似佢地咁!」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。