【又到聖誕】環保換物皆大歡喜？ 衛詩雅陳家樂抽到廢物笑唔出
平安夜除咗街裡愛人一對對，唔少人會選擇同朋友開派對倒數迎聖誕。抽獎都要講運氣，為免有人空手而回，好多時都會玩交換禮物，近年更興起玩「環保換物」，將屋企一啲自己無用，食之無味棄之可惜嘅嘢拎出嚟交換。日前衛詩雅、陳家樂、許靖韻連同一班公司同事開Party，開宗明義玩交換廢物，仲上載咗片段到Facebook，唔少人睇完都覺得好有共鳴，到底邊份禮物最廢，收到最想反檯呢？仲未準備禮物嘅朋友不妨參詳一下。
過期六合彩10張
香港人唔少都鍾意測試一下自己嘅運氣，小小地買六合彩買個發達夢都唔錯，十張六合彩票最平都真係要$100，符合交換禮物條件。不過十張過期彩票，除咗警醒大家要靠自己唔好諗橫財，其實可以拎去回收。
摺檯一張
摺凳貴為七大武器之首，奧妙之處可以藏於民居之中，隨手可得仲可以坐著佢來隱藏殺機，就算被警察捉到都告你唔入！呢次仲要拎張摺檯出嚟交換，實用性本身好強，不過要喺公司抬番屋企，可能要CALL車先得啦。
過期月餅
每逢節日總有唔同應節食品，端午食糭冬至食湯圓新年食瓜子，要數最容易食剩嘅應該係月餅，比較滯每次食得唔多，留番聖誕節用嚟交換，呢個提議的確唔錯，不過記得睇下過咗有效期未呀，食到肚痛就唔好啦。
已開封護膚品
護膚品其實係幾實用，買保濕系列無論男女都適合，不過拎番上年抽番嚟，開封試用過嘅嗰一罌出嚟，都真係幾唔衛生，搽上面敏感點算好呀﹗寧願抽到一疉試用裝好過啦。
有漬有味小背心
每個女仔屋企都總有十件八件背心，打底防走光保暖襯衫都得，非常百搭。由許靖韻提供的粉紅色背心仔，隻色雖然搶眼啲都總叫用得著，但原來開Show用過上面仲要有漬，呢個係咩玩法呀……
I Phone5電話殼
手提電話每個香港人都有，可能唔止一部添，送電話殼本身係幾實用嘅一件事，不過拎嚟交換，又點知抽到嗰位用緊咩型號電話呢。呢位同事仲要送出I Phone5電話殼，I Phone X都出咗成個月啦，真係拎番屋企裝瓜子殼咩……
車頭相架
雖然樣樣都廢，但數到壓軸最廢一定係陳家樂收到的相架。由細到大交換禮物，得到唔少杯呀、擺設呀、相架之類看似實用嘅禮物，廢又唔廢得晒但自己唔會用囉。陳家樂抽到呢份A4 Size相架要買都好幾十蚊架，不過擺張黑白相喺度，話晒過節真係大吉利是咩。