【25周年】林志穎歷年專輯淪為囝囝層層疊 宣布出新碟開世界巡唱
撰文：洪曉璇
出版：更新：
原來林志穎已經出道25年，但佢個樣似係25歲都未到，上天真係唔公平﹗
提起林志穎大家會諗到啲乜？Kimi爸爸？iPhone VIP？職業賽車手？後生一輩可能只記得佢拍《爸爸去哪兒》，但其實17歲出道嘅林志穎係歌手出身，以小旋風之名橫掃亞洲，出道1年即踏上紅館舉行個人演唱會，創下最年輕紅館開個唱男歌手嘅紀錄，至今都仲未有人打破。原來眨下眼佢已經入行25周年啦！呢日宣布相隔11年後將會推出新碟，仲會開世界巡迴演唱會添！
呢堆錄音帶同CD真係古董級，不過對林志穎囝囝嚟講，其實只係一堆玩具。(林志穎微博)
林志穎不時上載一對孖仔嘅相片，盡得爸爸真傳好可愛好靚仔呀﹗(林志穎微博)
被封為人生勝利組代表嘅林志穎，一出道已經爆紅，但佢喺96年事業高峰時選擇入伍當兵，退伍後出過幾隻碟成績都未如理想，毅然到內地拍劇，憑住段譽、小魚兒等角色再度爆紅。之後遇上爸爸離世再到大仔Kimi出生，林志穎發覺家庭先係最重要，推咗大部分演藝工作陪囝囝成長。早幾日佢整理25年來出過嘅錄音帶及CD時，被囝囝拎嚟當玩具層層疊高，令林志穎笑言：「是不是該多發點專輯，讓他們可以疊得更高！」估唔到事隔幾日佢就宣布將會出新碟嘅消息啦， 絕對係歌迷們最好嘅聖誕大禮。
多得佢地拎專輯當層層疊咁玩，林志穎即刻話出多幾隻碟俾佢地疊高啲。(林志穎微博)
+8