【筋肉人夫】杜汶澤爆肌舉160KG鐵餅 田蕊妮：係咪要參加奧運？
撰文：洪曉璇
出版：更新：
講到中年男士特徵，通常會即時諗起禿頭同大肚腩，甩唔甩頭髮好多時睇先天遺傳，至於會唔會中年發福，就要睇你放唔放棄自己啦。日日有住家飯食，食完就坐坐完就瞓，想唔中央肥胖都幾難，雖然新陳代謝的確比年輕人慢，但有心唔怕遲，好似幸福人夫杜汶澤，自己識煮咁多好嘢食一樣keep住fit爆身形，呢日上載短片，成功舉起160KG鐵餅，足足352磅！
要贏人先要贏自己，不過大家要試都記得好似杜汶澤咁，有專業教練在場先好呀。(杜汶澤Facebook)
聖誕長假期，去完一個又一個派對，大堆脂肪食落肚，杜汶澤都keep住去做運動，27號中午又去咗健身室，留言話：「挑戰三餅半（160kg），成功！」160Kg有成352磅喎，分分鐘有3個田蕊妮咁重，睇返段片一開始阿澤埋位行到儀器前，喺教練輔助下，舉起三餅半足足160kg。一舉起阿澤已經標晒汗，狀甚痛苦但繼續頂硬上，深蹲再舉起兩下，當放低鐵餅一刻佢即時跪低不停深呼吸，真係睇到都覺得辛苦。連老婆田蕊妮都不禁轉載短片兼留言問：「係咪要參加奧運？」
雖然只係舉起兩下，但160kg真係唔講得笑，一放低阿澤即刻跪低抖大氣休息。(杜汶澤Facebook)
其實勤於鍛鍊嘅又點止阿澤一個，張繼聰呢個聖誕節帶住老婆謝安琪以及兩個小朋友周圍去，都有偷時間去健身，仲一邊舉啞呤一邊大show結實手臂，佢臂上個紋身簡直好似想爆出嚟一樣。如果阿澤舉得起3個田蕊妮，唔知阿聰可以舉起幾多個謝安琪呢？
食幾多嘢做番咁多運動，所以張繼聰一直keep住爆肌身形。(影片截圖)