【有無咪嘴】萬年音痴洗污名？ Angelababy唱英文歌被讚天籟
撰文：洪曉璇
出版：更新：
喺娛樂圈幕前工作，即使本身係演員，都總會學定三幾首金曲，可以登台獻唱搵真銀。Angelababy以模特兒身份出道，再進軍影壇及主持界，佢曾經喺綜藝節目中開金口獻唱，嚇窒全場，估唔到今年佢又挑戰自己，喺內地跨年晚會上大展歌喉，獻唱英文歌曲《Five hundred miles》，唱功平穩聲音甜美，不過因為同以往歌聲實在差太遠，惹來網友質疑係咪嘴造假。
Angelababy於內地跨年晚會上獻唱，歌喉令人驚艷。(微博圖片)
黃曉明假假地都出過專輯做歌手，不過公開批評老婆唱功又真係大膽咗啲。(微博圖片)
以往Angelababy都曾經喺節目上唱歌，超高「海豚音」嚇窒拍檔鄧超等人，網友更以音痴形容Baby。最好笑係連佢老公黃曉明都多次公開吐糟Baby唱功，其中一集《奔跑吧》中，Angelababy接到任務要黃曉明講出「你要出專輯嗎？」呢句說話，喺試探過程中估唔到曉明大哥脫口而出：「我看你還是算了吧，要不還是我唱歌來養活你，好嗎？ 」到早前嘅綜藝節目《中餐廳》中，曉明又再次評論老婆唱功：「我唱歌比她好聽太多了，只有這點我敢吹牛！她唱歌真的不太好聽，但是我覺得比李晨的好一點。」
Baby曾經喺綜藝節目中開口唱歌，實在令人難忘。(影片截圖)
Angelababy 30號晚登上浙江衛視跨年晚會，演唱英文歌《Five hundred miles》，聲音清澈唱功平穩，絕對有專業歌手水準。不過由於唱得實在太專業，令人不禁懷疑佢係咪嘴，睇番條片唱到最後幾句，又的確有少少對唔上咀型，但fans就力撐係直播訊號Delay所致，到底有無造假不如大家自己睇下再判斷啦。
到底Baby係真唱定假唱？已經成功攀上熱搜榜話題。(微博截圖)