【勁歌總選】與麥明詩主持大騷表現被批　馮盈盈：說不緊張就騙人

《勁歌金曲頒獎典禮2017》喺一片爭議性中落幕，小圈子、無卡士，而最為人垢病就係主持表現。陸浩明帶住馮盈盈、麥明詩兩個主持新丁，第一次做咁大型live show，全晚可以話係甩碌不斷，忽然跳抖肩舞freestyle更加被網友列為比關家姐更經典事件。面對種種批評聲音，佢地分別於網上撰文回應負評，馮盈盈話：「由收到通告那刻就知道這是一個大挑戰……說我不緊張就騙人的。」

陸浩明同馮盈盈、麥明詩呢個《後生仔》主持組合，登上年度大騷舞台做主持，經驗不足就絕對係無容置疑，兩位港姐冠軍全晚多次食螺絲，懶音不絕，麥明詩喺31號晚留言分享首次主持大騷感受，佢話：「Show當晚當然有好多做得唔夠好的地方；深深咁體會到做司儀係好具挑戰性。歌手說話長短、反應全部都預計唔到同冇得排練，所以每一部分都要臨時作出好大嘅改動。見到『6號』點樣去應變，令我得益好多，亦都漸漸學緊去放鬆自己。凡事都有第一次，好開心2017年完結之前又可以有一個不一樣嘅嘗試，希望2018年可以繼續努力，睇多啲Do姐嘅主持show向佢偷師，不斷進步，帶到俾觀眾更多唔同嘅節目同埋感覺！」

而馮盈盈當晚除咗要做主持，更喺開場時孖住4位小花又唱又跳《到此一遊》，網友話佢落力有餘但反應實在太浮誇，盈盈喺Facebook留下數百字感受：「第一次擔任大騷司儀，就是主持其中一個突發狀況最多的直播節目，勁歌金曲頒獎典禮。由收到通告那刻就知道這是一個大挑戰，即使再多準備和排練都一定會有變數，所以最考司儀的臨場應變和轉數。昨晚說我不緊張就騙人的，第一次主持就要對住一大班專業歌手，還要先又唱又跳表演，期間還因為節目超時而不斷有改動，全日無一刻放鬆過。回看昨晚表現，自己還有很多地方要改善和學習。我知道無論背後難處或苦衷如何，最着眼還是出來的表演成果。」最後佢亦多謝拍檔6號和Louisa。其實人人都有第一次，知错能改善莫大焉呀﹗