傳吳千語另結富三代新歡上海蜜會　為保新戀情決心同林峯斬纜

林峯同吳千語拍拖5年以來，屢傳分手，繼早前有傳兩人的感情於半年多前已陷入膠着狀態，甜蜜不再，兩人出席公開活動時亦都分別承認近期好少見面，但就否認分手。今日又有報道指其實千語BB已經識了個富三代男朋友，所以就向林峯提出分手。傳聞指千語BB的新歡是前全國政協施子清的長孫，現年28歲的施伯雄，家族財力雄厚，兩人是經由千語BB的好友馬天佑介紹之下認識的。既然有了條件更佳的新對象，千語BB自然就要同林峯正式斬纜。

該報道又指林峯一直想挽救同千語BB呢段5年情，所以沒有公開認分手，不過千語BB心意已決，已經全情投入新歡懷抱。近月千語BB於橫店開工，適逢施伯雄於上海做生意，兩人就經常於上海約會，而千語BB都有些避忌，每次都會約埋好友馬天佑同行。據知施伯雄雖然是富三代，家族有米但作風低調，自己創業的他平日都是坐地鐵代步，生活相當貼地，睇來近年跟林峯歎慣享受慣，過慣富貴生活的千語BB要重新適應了。