【任噏亂評.溏心風暴】網上盜睇唔係收視差借口 TVB幾時認輸?

撰文:
最後更新日期:

《溏心風暴3》一星期一次的成績表又出爐,收視一直都相當平穩,有21.1點。播了5個星期,頭4星期的收視分別是22.2、21.5、21.4和21.5,真係好平穩,好平穩地低。為着呢個低收視,無綫都已經有不少人出來撐場解釋,第一是因為大陸有首播版本,大家好多時都上網用盜版方法去睇《溏心風暴3》,統計唔到呢班觀眾,收視咪差咗囉!

收視真係一直地差。(劇照)

+11
+10
+9

不過呢個講法其實相當可笑,上年其實無綫都同大陸有不少合拍製作,例如《踩過界》和《使徒行者2》,呢兩套劇集的平均收視都要比《溏心風暴3》高,《踩過界》平均有22點,除了大陸先播,仲要香港放星期六日播。《使徒行者2》一開始已經高開,平均收25點,雖然之後有回落,不過仲可以保持住23點平均收視完場。除了合拍劇,早幾個月無綫直情買咗一套大陸已經一早播放完畢嘅《射鵰英雄傳》放喺8點半黃金時段,結果收視十分之好,平均有24點,最高更收30點,你叫《溏心風暴3》情何以堪?當TVB還不停去為《溏3》護航,其實客觀嘅數字已經大大力打咗佢幾鑊心口,當你仲要死撐嘅時候,唔及早瞓底認輸,咁之後咪愈來愈痛囉!

明嘅!出咁多人力物力,高成本嘅重頭台慶劇,無綫一定唔想衰,就算衰咗都要搵借口死撐,不過咁樣好咩?其實高層有無諗過不如認認真真咁正視自己嘅問題,如果出嚟同大家講:「其實今次我哋真係估計錯誤,以為頭兩輯咁收得,大家都會繼續鍾意睇。唔緊要喇,我哋會接受觀眾嘅意見,唔再拍第四輯㗎喇!」咁咪可以大方得體,又贏得到觀眾嘅歡心,呢啲咪一個公關嘅重要性囉。你要死撐,唔肯認自己捉錯路,啲觀眾咪一路繼續鬧,話你守舊,話你套路一成不變,仲要咁啱上一套係口碑大好嘅《降魔的》,個對比係幾咁大呀?不如都係停一停,諗一諗,睇吓點樣同大家解釋今次收視仆直嘅結果喇。

《射鵰英雄傳》喺大陸已經成套播晒,上網周圍都有得睇,收視都跑贏,呢啲咪質素囉。(網上圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。