【JBJ香港粉絲見面會】高田健太自爆無朋友慶生 同粉絲過好感動
JBJ 6子盧太鉉、金相均、金東漢、金龍國、權玄彬、高田健太（Kenta）首個香港粉絲見面會《JBJ 1st Fan Meeting In Hong Kong “Come True”》尋晚（6號）經已完滿結束！雖然今次就無請粉絲上台一齊玩，只係得JBJ自己玩畀Joyful（JBJ粉絲名稱）睇，但相信Joyful都一樣受落。
攝影：黃國立
其中JBJ就要cover其他團體嘅舞曲，最低分嗰個就要接受大懲罰，首先播出TWICE《LIKEY》時，金相均同高田健太就跳得非常落力，反而金東漢、權玄彬同金龍國就只係企喺到齋睇，仲好似大叔咁拍手掌。但一播到BTS防彈少年團嘅《Blood Sweat & Tears》時，身為忠實粉絲嘅金東漢即刻超有自信、超落力咁足本呈現，而權玄彬同金龍國就繼續扮大叔拍手，當MC問到佢哋點解唔跳下，金東漢就話：「因為佢哋身價貴所以唔易郁！」而播到前輩I.O.I嘅《Pick Me》時，就更係6子全部一齊跳啦！但係負責唱歌嘅金龍國就有少少甩甩地，高田健太就因為太落力，跳到耳機都甩埋，好彩其他成員都好貼心即刻幫佢整返好。高田健太因為狂舞完出咗勁多汗，仲問Joyful係咪要除咗件恤衫添！
除咗cover dance之外，JBJ都有跳返各自喺《Produce 101》Season 2入面表演過嘅歌，好似《Open Up》、《Show Time》、《I Know You Know》同《Shape of you》等，不過就略嫌太短唔夠喉，仲好似唱K畀人停唱咁添！但係喺高田健太同金龍國表演《Open Up》時就發生小插曲，兩人喺表演途中盧太鉉同金相均突然爆笑，之後高田健太解釋：「《Open Up》編舞入面有個動作好似中槍咁要瞓落地下，因為喺中槍個下唔小心對住坐喺後面嘅盧太鉉同金相均翻咗個白眼，因為得佢哋先睇到，所以佢哋就突然大笑。」
《JBJ 1st Fan Meeting In Hong Kong “Come True”》進行咗一個鐘多少少MC就宣布已經接近尾聲，不過香港嘅Joyful就好貼心準備咗驚喜影片送畀JBJ。首先就係同1月10日生日嘅高田健太預祝生日，睇完影片嘅高田健太仲話自己好感動，又不斷發出「哇」嘅感嘆，之後JBJ仲同全場Joyful唱生日歌！而好感動嘅高田健太仲話想同Joyful合照，更拎咗手機出嚟自拍，影完相之後又喺台到行嚟行去，務求同到每一個Joyful揮手打招呼以示謝意。
之後高田健太仲自爆佢喺2年前第一次去韓國嗰時，因為無朋友所以得自己一個喺考試院食即食麵過生日。今次以JBJ名義同大家一齊過真係好開心，仲話希望出年可以喺更大嘅地方，同更多人一齊慶祝！最後隊長盧太鉉表示：「我哋嚟緊會以新歌《True Color》comeback，希望大家多多關注。希望下次可以再嚟見香港Joyful，多謝大家，有你哋先有我哋！」提到新專輯《True Color》時，金東漢仲即刻唱咗兩句，而金相均都話：「好想快啲再同大家見面啊！」
[JBJ香港粉絲見面會]全力唱《Fantasy》 高田健太、金龍國爆行蹤
下載《香港01》App，更多韓星靚相、影片率先睇！
iOS：http://bit.ly/hk01app-iOS-download
Android：http://bit.ly/hk01app-Android-download
我們01韓迷的facebook專頁Kpop 01已經開始喇！想知道更多韓國娛樂、飲食、玩樂、時尚資訊，快點去給like吧：https://www.facebook.com/hk01.kpop/