【誇世代】陳豪被車撞連蝴蝶效應都玩埋　算命佬消失似《陰陽路》

台慶劇《誇世代》仲有幾日就大結局，嚟緊接住就係懸疑劇《平安谷之詭谷傳說》頂上，一開始已經知《誇》係膠劇，好多老橋段都有用到嚟「致敬」。但估唔到去到尾聲劇情就開始崩壞，坐的士玩時空穿越已經滿足唔到大家，所以今次實行「膠事認真做」，仲加入埋穿越劇大招「蝴蝶效應」，講Mike（陳豪飾）坐時空的士遇見自己被車撞死，編劇仲怕大家唔明呢個Term，所以陳豪仲同大家解釋問時空豬：「蝴蝶效應？係咪即係細小嘅變化，就足以帶動成個系統嘅運作？」

好喇，睇怕大家聽完都唔太明陳豪講緊咩，反正就係陳豪做咗啲嘢影響到佢自己被車撞死，但時空豬就好玄咁話：「命運係冇得改變嘅。」陳豪就好擔心咁坐的士回到過去阻止自己被車撞呢件事，中間佢就遇到好似警訊入面先會出現嘅算命佬，算命佬批佢時日冇多，教陳豪一字記之曰就係「逃」，講完就成個檔口連埋個算命佬都消失咗，成件事好似電影《陰陽路》咁，《誇世代》臨埋尾先搞咁多玄幻嘢，都唔知大結局嗰日點收科。