王祖藍38歲生日 李亞男煮住家菜兼獻吻
撰文：洪曉璇
出版：更新：
成日話7年之癢，其實唔係乜嘢魔咒，只係好多時相處耐咗，生活變得平淡無火花，如果識得不時為對方製造驚喜，感情自然會愈來愈好。王祖藍同李亞藍06年已經暗中戀上，至2015年先拉埋天窗，相知相許多年都依舊甜蜜。1月9號係王祖藍38歲生日，壽星仔選擇喺工作中度過，不過老婆仔就同工作人員夾計仔送驚喜，孖埋王媽媽李媽媽一齊幫祖藍慶祝生日，令佢非常開心。
王生王太一向相當恩愛，早前就抽空去到馬爾代夫再度蜜月。(資料圖片)
李亞男當眾獻上birthday kiss。
王祖藍呢日喺內地錄影綜藝節目，生日都繼續搵真銀，李亞男原來一早準備，同外國返嚟嘅李媽媽兩母女一齊下廚，煮餐煮家飯慰勞老公，仲約埋祖藍媽咪殺到錄影現場送上生日蛋糕。雖然二人結婚已經兩年幾，但當眾咀嘴時都仲有啲尷尷尬尬，場面相當搞笑。同場嘅杜麗莎以及杜麗莎大女T.V. Carpio（梅天悅）亦被開心氣氛感染，全程笑不攏嘴。
（左起）李亞男、李亞男媽咪、王祖藍、杜麗莎、王祖藍媽咪。
同場嘅杜麗莎及囡囡T.V. Carpio（梅天悅），為壽星仔王祖藍獻唱送上祝福。
問到祖藍生日願望，佢竟然搞笑話希望旗下藝人都與他一樣，每一年都keep住生日有工開，並謂：「幾辛苦都冇所謂，最緊要有時間陪老婆。」他又直指同事們送上的生日卡真的很「驚」喜：「呢張生日卡就好似叮噹嘅百寶袋咁，咩都有。除咗有同事充滿誠意嘅服務換領券之外，竟然仲有同事封利市畀我，真係好受寵若驚。能夠同同事相處到好似朋友咁，係我一直最大嘅心願，希望嚟緊大家都繼續開開心心，一團和氣。」
睇嚟王祖藍相當得同事歡心，大家專誠整張「童真手工生日卡」送俾佢，非常有心思。
+4