【開心速遞】孖大小姐跳情侶手指舞　許家傑：KC Terry預咗走唔甩

大小姐同送水輝呢一對，最近幾乎每集都成為焦點，林淑敏更憑住呢個角色，被網友熱捧做最佳女主角。呢日林淑敏上載短片，原來佢同許家傑終於排完舞啦，見到佢地跳得相當合拍之餘，表情同身體語言仲暗藏角色性格，好似大小姐飛撲送抱，送水輝會避開兼一臉錯愕，大小姐見狀表現谷氣。到最尾送水輝出奇不意吻向大小姐面頰，又會唔會代表劇中佢地好快開花結果呢？林淑敏留言話：「2018我希望會同送先生。。。許家傑！」最重要係Hashtag，因為佢點名話下一對到KC&Terry，呢對男男CP今次錫唔錫呢？實在令人期待﹗

林淑敏同許家傑分別接受香港01訪問，Mandy就話都係速成現學現賣：「大約學跳咗半個鐘左右啦。第二日都係靠食晚飯時間先得閒，同Jack夾下排舞同埋拍片大約半個鐘左右。」不過原來拍呢條片用咗超強嘅期後班底架：「條片係KC揸機，Terry盈盈Jenny三個揸閃光燈，因為當時都夜啦唔夠光，靠佢地手機微弱燈光先拍得到。仲有政峰家樂佢地喺喺旁邊提點細節位，點樣會再sweet啲，我地拍到佢地識笑先收手。雖然鏡頭前得我地兩個，但睇到《愛回家》團隊精神真係好開心。」

至於片中許家傑錫咗面珠一啖，有網友覺得好SWEET之餘，都話不禁擔心Mandy老公會唔會呷醋，Mandy就話：「哈哈哈，老公都有俾like同share條片，無呷醋呀仲邊睇邊笑。雖然戲入面話我好鍾意送水輝好主動，大家係成年人無嘢啦緊係，知道做戲啫。」至於許家傑接受香港01訪問時表示：「其實跳情侶手指舞係自發性嘅，一開始阮政峰蘇韻姿玩先，本身無話專登要邊個接棒，不過慢慢大家逐個拍，就變咗好似之前冰桶挑戰咁樣點名挑機，我地知道馬貫東同謝芷倫tag咗我地之後咪練習囉。拍完之後我地tag下一Pair，KC同Terry都預咗走唔甩架啦﹗」