【降魔的】馬國明等合體拍片起舞 何遠東：網友集氣拎獎開續集
距離今年TVB台慶頒獎禮仲有3日，所有藝人都盡最後努力拉票，希望自己嘅作品可以得到好成績。頂頭大熱劇集《降魔的》今年鋒芒盡露，原本只係一套實驗性質嘅劇集，可以得到呢個成績的確令台前幕後喜出望外，編審羅佩清透露續集叫《降魔的之十字路口》，一眾劇中演員都出力再推，排舞拍片極速剪完放上網，何遠東接受香港01訪問時就話：「我地好突發去做呢件事，真係好熱血，希望集氣開續集﹗」
《降魔的》第二季隨時開鏡 編審羅佩清親證：進一步開展靈異世界
呢條《降魔的之攪咩鬼習作》片長1分鐘，用上《降魔的》主題曲《到處一遊》做背景音樂，成班劇中演員包括馬國明、黃智雯、胡鴻鈞、黃子恆、蔣志光、謝雪心、何遠東、譚嘉儀、林凱恩都有參與拍攝，除咗有舞蹈底子嘅黃智雯喺尾段熱舞，其他人主要以手勢為主，唔好以為佢地Hea，原來係有含意架。何遠東接受香港01訪問時就話：「我地無手勢舞咁勁，叫做跳一隻男女老幼都啱跳嘅舞，如果稱得上係一隻舞的話，哈哈哈﹗大家留心睇的話，d動作其實全部係喺車廂入面，揸車時會做嘅動作，好似扭軚、戴安全帶、調較倒後鏡位置等等。」睇真啲的確相當貼題噃。
何遠東透露呢個Project真係好趕，但成班演員又可以聚埋一齊好似re Union咁真係好開心：「我地好突發去做呢件事，前晚拍片尋日剪咗成日就出啦，監製編審開咗氣題，問我地可以拍啲咩片，之後用咗好短時間，好似大學生去Ocamp第二朝就要交功課，要即刻拿拿聲排舞拍片，成件事真係好熱血﹗其實真係好開心，大家回憶返晒嚟，心姐阿蔣都肯一齊跳一齊癲。啤啤要拍劇嚟唔到，都知會約漏人架啦，唔緊要啦，可能有續集嘅時候佢會變咗做final boss呢﹗」
之前編審羅佩清話，續集已經有晒初步構思㗎喇，就連劇名都諗好埋，叫《降魔的之十字路口》，令網友都相當期待。演員們又忽然拍呢段片，喺台慶前呢個時間點推出，何遠東都坦言當然別有用意啦：「當然想叫網民集氣，開到續集當然好啦﹗除咗開續集，如果嚟緊頒獎禮，我地可以拎到最佳劇集就最好啦，好靠大家嘅支持同投票先得呀﹗」