【萬千星輝】唐詩詠拍片拉票做視后　一秒含淚好犀利

TVB嘅「萬千星輝頒獎典禮」日漸逼近，除了公司播廣告為藝人拉票，藝人私底下都要諗方法突圍而出。就好似「龍貓」何遠東同「Cherry」唐詩詠咁，今日佢哋就嚟咗段crossover，名叫「不懂降魔的女人」，交叉重演《降魔的》及《不懂撒嬌的女人》在的士上的場面。

唐詩詠上咗的士之後，掉十蚊銀時唔小心掉親前面飾演的士司機的何遠東。何遠東秒速抽水，講咗幾句：「仲話你係不能錯過嘅女友，其實你就係不斷錯失的女人呀！做咗咁多年，獎呢？你有冇呀？」唐詩詠之後就話：「都冇所謂喇，都咁多年囉…」話口未完佢就嚟料喇，重現返佢喺《不懂撒嬌的女人》同宣萱鬧交嘅場面，秒速含淚，真係好演技。之後何遠東都重演返龍貓畀人壓死嗰幕，不過死唔去…

去到最後，兩人就入正題。唐詩詠原來極睇好何遠東，仲公開祝福到時一定會拎獎。何遠東都講笑咁話，到時會著白底衫出席台慶。不過，臨尾都要自抽公司一下，當唐詩詠諗緊自己到時著咩衫時，自爆咗句：「限奶令喎…」不過佢都預告咗到時會著露背…今次個組合都幾特別。