【萬千星輝】鍾鈺精做足頒獎小姐12年 :見到人攞獎都開心

撰文:
最後更新日期:

任何頒獎禮都一定有頒獎小姐,工作是送嘉賓進場,再將獎頂送到頒獎嘉賓手中,然後送嘉賓落台,看似簡單不過的工作,其實一出錯就大鑊,這個崗位在無綫稱為escort ,鍾鈺精Emily由05年開始,就擔任每年萬千星輝頒獎禮的escort,12年來觸摸過不少視帝視后獎座,亦旁住不少大明星出場,她說:「雖然攞獎嘅唔係自己,但見到佢哋攞獎其實都好開心。」

上年鍾鈺精亦有份當頒獎禮escort,除了頒獎,亦要送香檳。(資料圖片)

看着別人拿獎都開心?可能大家覺得她答得「行」,但鍾鈺精除了當escort外,平時亦有拍劇,見盡不少上位小生花旦捱上來,深知要上到台,得來不易,她說:「我哋角色唔重,《平安谷》我都係做村民,主角辛苦過我哋好多,你喺電視見到拍一兩個鏡頭咋喎,其實係試過好多次,唔得再嚟過,出街幾秒,其實辛苦咗好耐,所以我係欣賞佢哋。」

啲獎都係佢負責拎出嚟。(資料圖片)

在無綫工作是鍾鈺精第一份工,未當藝員前,她是dancer,兩歲學芭蕾舞,學到8級,但因為視網膜脫落,轉職做藝員,雖然是新工作,但鍾鈺精覺得適合,她說:「我公屋出身,細細個當然係會追明星,我係有買Yes卡嗰啲人,所以做escort 可以見到好多大人物,我係普通市民,平時點會有機會接觸呢啲人呢?有人笑我做escort,做到可以開班授徒,但我唔介意喎,因為呢份係我嘅工作,我亦搵到當中嘅樂趣。」

當藝員前,鍾鈺精(右三)是TVB舞蹈藝員,因視網膜問題,無奈轉職。(受訪者提供)

鍾鈺精由少女開始做escort,做到現在已是媽媽,絕對係御用escort,當年都做過9年escort的鄭世豪,現在都變了歌星,鍾鈺精依然緊守崗位,心態正面,她說:「我當然戥佢高興,但自己亦冇特別羡慕,我做好自己崗位就夠,其他嘢唔好諗啦。唔係唔積極,係呢啲唔到我諗;我冇諗過自己要攞獎喎,其實經過我手嘅支票或者獎座,又唔係個個輕易接觸到,唔係自己氹自己,而係我覺得都OK啦。」

《平安谷》鍾鈺精亦有份演出,同一眾演員包括翟威謙、楊證樺夫婦等相處融洽。(網上圖片)

【萬千星輝】20年邊個攞得最多獎? 有人今年有機打破視帝記錄

【萬千星輝】最強預測!五強名單 TVB夠唔夠膽俾《溏心風暴3》?

【萬千星輝】最強預測.下集!配角飛躍多黑馬 拍檔獎係Do姐農夫

行外人當然以為做藝人,個個都要大紅大紫,但又有幾多人上到位,她說:「只有你有一個機會做好一個崗位,我做得好,就覺得對得住自己,冇諗過其他乜嘢,唔理係escort或者路人甲,我覺得做好佢,就已經OK㗎喇,而且你諗到無用啦,唔係你想就得,要好多嘢配合,俾到你做好佢,就得㗎喇!」

TVB 50周年,當然要同佢合照啦。(受訪者提供)

鍾鈺精雖然已有個幸福家庭,但小粉絲心態依然不變,她說:「我真係好鍾意集郵㗎,哈哈,都真係同過好多人影相,我最鍾意發哥,我記得係拍《On Call 36小時》,喺伊利沙伯醫院度拍,咁啱佢經過,即刻同佢合照,嘩!真係好開心呀。」

鍾鈺精自認愛集郵、見到歌神張學友當然不能放過啦。(受訪者提供)

拍《on call 36小時》,鍾鈺精終於圖夢,可以同兒時偶像發哥合照。(受訪者提供)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。