陳建州偷影保母偷著范瑋琪高踭鞋　小亨堡攬過男神彭于晏

有留意黑人陳建州和老婆范瑋琪社交平台的粉絲，都會留意到他們一對孖仔飛飛翔翔的保母小亨堡，小亨堡仲成日被陳建州整蠱，而佢嘅被整嘅逗趣表情令佢意外走紅，黑人1月25日喺Instagram同Facebook上載咗小亨堡試著老婆范范嘅高踭鞋，寫下：「小亨堡昨晚偷穿范范的高跟鞋，準備參加今晚她妹妹的婚禮。」

睇張相嘅畫質，應該係黑人從監控視像上影低嘅，平時打扮中性，著開波鞋嘅小亨堡顯然著唔慣高踭鞋，勉強企起身都企唔直個人，尷尬到雙手掩面，畫面違和得嚟又充滿喜感，呢幾張相一貼出嚟幾粒鐘就吸引超過五萬個Likes，仲多過佢平時自己的相，好多網友都留言話小亨堡好可愛添！

作為明星家的保母，小亨堡享有好多令人羨慕嘅員工福利，例如成日可以集郵，佢仲試過攬住男神彭于晏影相，恨死一眾彭太。