【反黑】下架三個月後登陸Netflix　導演宋本中：4K拍攝只係基本

去年一套《反黑》，掀起大批網友追睇，不過去年10月尾大結局播出後忽然宣布24小時內會下架，網友大驚失色紛紛不眠不休追進度。事隔三個月大家終於可以再睇啦，而且仲衝出國際成為首部香港兼粵語劇集登陸Netflix，認真威水﹗導演宋本中接受香港01訪問時就話：「佢地要求真係好高，4K拍攝只係基本。」

【反黑】播完大結局24小時內下架　未追晒點算好？【反黑】招積演技獲認同　張建聲︰《向西》都花3個月去整頹自己

Netfelix呢日宣布《反黑》會喺2月5日上架，令網友感到相當驚喜，導演宋本中接受香港01訪問時，都難掩興奮心情：「又點止係首套香港兼粵語劇集登陸Netflix，大家都應該知道佢地把關好嚴，喺其他平台播過一集都唔會要。呢次係Netflix開咗之後，第一次，有劇集喺Youtube播晒再喺度上架﹗今次除咗有英文字幕，仲會有日文、韓文、西班牙文字幕都有，會喺195個地區發布。」

宋本中表示呢次重新上架，Netflix版同之前大家睇嘅版本基本上係完全一樣，只係微調咗少量犯駁位，即係啲血腥縫嘴情節全部都睇得番。大家都知道Netflix睇得上眼嘅作品都好高質，宋本中都有透露箇中要求：「佢地要求真係好高，4K拍攝只係基本。上架事少，嚟緊第二季同埋其他項目，係用咩身份去合作。基本上一定要係荷里活電影公會認証嘅演職人員拍攝，先可以合作到，所以今次真係為港爭光架。」

而呢次第一季上架只係個開始，宋本中話嚟緊仲會有大量多方面合作：「嚟緊新年前會有個全球多媒體發布會，唔單止係公布第二季拍攝，仲有多方面涉及到唔同年齡層嘅發展，只可以透露其中一項，會係同一個世界國寶級遊戲會Crossover。」《反黑》中飾演招積令人氣急升嘅張建聲亦表示：「感謝各位觀眾支持才能把《反黑》衝出香港，邁向國際，這個奇蹟全靠每一個有收看過《反黑》的「你」。而「招積」的復仇大計亦向全球蔓延中⋯」