【港女講感情】阿嬌鍾欣潼認愛賴弘國 有錢有樣邊使人「埋單」？
撰文：李妍樺
出版：更新：
給女人一個家就是嫁，聽起嚟好溫馨，但原來女人過咗30歲同人結婚就會被話係搵人「埋單」，呢個係咩玩法？阿嬌尋晚喺IG度Share張3卡巨鑽戒指相話畀大家聽佢結婚，點知大家除咗祝佢幸福快樂之後，竟然又抽返淫照十周年水，又話咩有人肯要阿嬌就執到啦，仲笑話佢未婚夫賴弘國係「辦年貨」，好心網民積下口德啦。
【港女講感情】旅行青蛙點解咁受歡迎 青蛙唔受控制最中女人心理
【港女講感情】陳嘉倩陷入感情三角大混戰 賤男一拖二先最抵鬧！
阿嬌公佈同賴弘國結婚。（網上截圖）
成日話「你的樣子如何」，以阿嬌個樣嚟計，冇10分都有9分啦，可以娶到阿嬌絕對係一件好似中咗六合彩咁開心嘅事，可能未必啱每個人胃口，但肯定唔係賣剩蔗咁要等人埋單咁囉！大佬，阿嬌喎，係咪大家葡萄咋，如果今日同阿嬌結婚嘅係你，我諗大家未必會覺得係埋單，而會覺得係執到寶。
我知你實講咩㗎，話女仔畀人睇晒全相唔值租啦，喂，你估佢想㗎？人哋同男友拍拖，揸機又唔係佢，佢出道係做Twins唱《女校男生》，都冇話要做蒼井空拍愛情動作片，要鬧應該係鬧拍嗰個陳生，又或者偷片嗰個奇拿啦，有咩可能Blame the victim，唔好仲停留喺女仔著得少布去酒吧就要被人非禮強姦啦，2018年依家。
阿嬌咁正，邊需要搵人埋單阿？（視覺中國）
+5
理性分析，埋單通常都係話女仔結婚搵個比自己有錢嘅男人，希望嫁畀個ATM，但阿嬌話晒都係香港第一女子天團Twins，身家好多個「0」，又有幾層樓揸手，點聽都唔係要搵人埋單啦。加上大家望吓阿嬌未婚夫賴弘國嗰堆EX.，全部都係得心口嘅G cup，阿嬌個樣絕對贏幾條街，邊有得比。所以話阿嬌係搵人埋單，Are you kidding me？佢又有錢，又有樣，調翻轉話阿嬌幫台仔搵單唔得咩？