《我獨自生活》Henry劉憲華為妹豪花93萬　下集有韓國女排金軟景

Henry提到妹妹Whitney要嚟韓國都好開心，仲去埋機場接機添！（影片截圖）

韓國組合Super Junior-M成員Henry劉憲華近日出演韓國綜藝節目《我獨自生活》，上次就講完Henry因為剝智慧齒成面腫晒又痛又講唔到嘢，應該係Henry史上最少嘢講嘅一日。尋日（2號）最新播出一集《我獨自生活》就講到喺香港工作嘅親妹Whitney，終於放假仲特登嚟到韓國探哥哥Henry。

Henry為咗Whitney仲準備咗花，一見面就要攬攬。（影片截圖）

親自為Whitney襯衫嘅Henry。（影片截圖）

女仔好多時都會有一個幻想，就係好想有一個哥哥可以無條件疼錫自己，但通常喺現實中有親哥嘅女仔都會同你講「有哥哥唔一定係件好事」，原因都離不開成日被阿哥恰、阿哥成日老點自己做嘢等等。不過今次Henry喺《我獨自生活》入面就化身做「愛妹號」，難得Whitney一場嚟到韓國，就帶咗佢去化妝、set頭、買衫，想買咩就買咩！最後Henry賣單一共使咗936,000韓圜（約HKD$6,722），雖然Henry賣單之前露出不捨之情，但就有問Whitney開唔開心？Whitney就當然開心啦，見到Whitney開心嘅Henry即使豪使93萬韓圜都無所謂啦！

Henry一下洗咗93萬雖有心痛，但為咗Whitney唔緊要啦！（影片截圖）

其實Henry事後接受《我獨自生活》節目組訪問時表示：「平時無機會買嘢送畀屋企人。」Henry作為哥哥所以就懷住補償嘅心，咩都好想買嚟送畀妹妹！但現實入面又有幾多個好似Henry、允浩@東方神起又或者李燦赫@樂童音樂家咁錫自己妹妹嘅哥哥呢？

好開心又可以見到金軟景上節目！（影片截圖）

+10

除此之外，下集《我獨自生活》節目組仲專程飛咗去上海搵韓國女排隊長金軟景（又譯：金延景）拍攝，金軟景現時效力上海光明優倍女子排球隊，仲有好多粉絲支持㗎！不過當金軟景聽到中國粉絲大叫我愛你時，就以「下…」回應，可愛又帶啲高傲，好想再睇多啲金軟景私下一面啊！

金軟景竟然驚魚！（影片截圖）