【反黑】第二季成本過億 28座大王宋本中搵荷里活巨星加盟
撰文：鄺鈺瑩
出版：更新：
《反黑》第一季搵到唔少老戲骨加持，導演宋本中透露第二季將會有荷里活級演員。（網上圖片）
網劇《反黑》去年上架之後深受網民喜愛，連Netflix都主動搵上門合作，成為首部香港兼粵語劇集登陸Netflix，今日正式上架，認真威水。導演28座大王宋本中表示，《反黑》重新上架，雖然未有加入任何特別場面，但為令觀眾有最佳的視覺效果，所以過去半年時間一直將細節位微調，更某些場口亦接輯得更順暢。大王表示：「片頭會變為英文，所以都好大工程去整。」
同過The Rock合作過嘅包括雲狄素（Vin Diesel），唔通係佢？！（網上圖片）
《反黑》第一季開拍時，因為資金問題令拍攝過程如同坐過山車一樣，如今作品有口碑又有點擊率，相信Netflix點都唔會放過呢個大好合作機會啦。而宋本中亦指出第二季資金十分穩陣，製作成本高達過億，問到可會力邀國內一線演員客串？宋本中就話：「哈哈！我哋而家傾緊荷里活級演員，一係唔做一做就要驚為天人，不過係邊個就暫時未公布得住，只可以話係同過The Rock(狄維莊遜)合作過。」大隻佬狄維莊遜拍過唔少勁片 ，當中以《狂野時速》最為出名，唔通係……